الموضوع يا جماعة عبارة عن كل واحد يدخل يقول هوة لية سموة باسمة انا سمونى محمود على اسم جدى الله يرحمة


ومعنى الاسم الحمد على ما اعتقد


والشهرة بيبو اصحابى فى الجامعة بيقولولى كدة


كل واحد يدخل يقول على نفس الطريقة دى

مفيش حد عارف اتسما كدة لية

وانا بقى ماما سمتنى ساره عشان شايفه انه اسم حلو
ومعنى ساره سرور وفرح
اما بقى شهرتى SaSO
موضوع جميل يا بيبـــــــــو

شكرا ليكىيا سارة بس باين ان الناس مش عاجبها الموضوع عشان كدة مفيش ردد

لا يا بيبــو مين قال كدة بالعكس الموضوع جميل بس زى ما انت شايف قليل ما حد بيدخل الساحة

فعلا يا سارة العدد بقة قليل جدا ومحدش بقة يدخل زى الاول

انا جيت نورت الساحة اكيد

انا بقى سمونى ايناس او بمعنى اصح اختى اللى سمتنى

معنى اسمى ده اللى لقيته بعد ما عملت سيرش ع النت

تدل على القرب والالفه والانس بمعنى الطمأنينه

من الأنس وهو ضد الوحشة,
وقيل هي المرأة التي يستأنس بمجالستها والحديث معها , ويطلق على الأنثى فقط

والشهرة بقى (نوسة)

تقريبا ماحدش خالص بيقولى ايناس

نايس توبيك

طبعا حضرتك منورانا وشكرا على ردك الجميل

موني مني علي اسم خالتي وقالو اهو اسم خفيف معاناه جمع امنية بس انا قررت اسمي نفسي ياباني عشان بحب الياباني وشكلي كده مش هكمل معاه وهنسيب بعض

يا جماعة انا اتولد واتسميت هبة اللة في لاول متفهموش اية اللي حصل وبقيت هبة واتسميت هبة على اسا اني هبة من ربنا هههههههههههههههههه وطبعا اشكر الوالد والوالدة على اعتبار انهم اعتبروني هبة من عند ربنا والحمدة لة على كل شيئ وشكرا

السلام عليكــم ورحمـة الله وبركاتــة ،،

موضوعك جميل يابيبو



انا سمونى سارة لان بابا كان فية بنت صغيرة يعرفها كان بيحبها اوى وسمانى على اسمها

كان اسمها سارة

وهو معناة زى ما سارة قالت السرور


الشهرة بقى الاسم لية اسامى كتير سوسو وساسو
وبوسى احيانا كتير يعنى والشهرة هنا هابو


موضوعك جميل يابيبو وفى انتظار المزيد من مواضيعك

الموضوع جميل جدا يا بيبو بس اعفينى من المشاركة فى الموضوع لانى مش هقول اسمى الحقيقى

شكرا لهابو وسارة وزوسر عالردود بس انت مش عاوز تقول اسمكلية يا عم هوة حد شايفك قول ومتخفشى



اوعة يكون اسمك هريدى واا حاجة ههههههههههههههههههههه بهرج معاك يا مان متزلشى


حيح فين هداية المنتدى اكنة ناقص حاجة وحشتينا يا هداية اخوكى الصغير محمود

يا بيبو هوة انتا مستقل بيا حضرتك ههههههههههههههههههه مشكرتنيش لية في ردي اشمعنة همة هههههههههه لا طبعا بضحك معاك ولا يهمك يا جميل وعلى العموم موضوعك جميل ويارب بالتوفيق علطول

انا بقى سمونى نورهان لان كان السم دة خليجى شوية بنت صاحب بابا مش مصرية خليجية فسمونى على اسمها بس انا اسمى مش عارفة معناة بس لوحد يعرف يقولى

اسمك هندى الاصل ومعناه نور الشمس والله دة المكتوب فى الموقع بتاع معانى الاسماء انتى طلعتى هندية هههههههههههههههههه


انا بهرج معاكى اوعى تزعلى

اى حد عاوز يعرف معنى اسمة يقولى

معلشى يا هبوش والله اصلى ساعات بيجيلى حول مش باشوف الردود شكرا ليكى على الرد

مش عارفة والله سمونى اية ليه
بس هو بابا حلم بالاسم ده وبس
وقالوا بالمرة بقى يبقى اية الله
انا بحب اسمى جدا وعاجبنى جدا الحمد لله
شكرا ع الموضوع

العفو

انا سموني كريم علشان ولادتي كانت طويله حبتين وكانت فيها خطوره ولما الدكتور خرج من العمليات قال لابويا مبروك ولد قال يا ما انت كريم يا رب وسموني كريم ..................................

وانا اقدر ازعل بردة دانت حتى قلتلى معنى اسمى ميرسى ليك

العفو يا نور الشمس

انا اسمى محمد وده اسم الرسول عليه الصلاة والسلام وانا بعتز باسمى ومعناه يقرب لحمد ربنا ورضاه

يترا كده المعنى صح ممكن الى عارف معنى اسمى يقولى؟؟؟؟


شكرااا يا بيبو على الموضوع

شكرا يا مان ومستنين مواضيعك

ربنا يخليك يابيبو وان شاء الله قريب بموضوعات

اية يا جماعة مفيش اسماء تانى والا اية مستنى ردودكم

اية يا جماعة انتوا مكسوفين من اسمائكم والا اية

فين سموكى كدة لية

ما انا رديت اهو يا محمود

معلشى يا ساسو مشفتش والله ربنا يكرمك يا جميل فين الباقى بقة

ولا يهمك

مستنين ردودكم معانا

انا اسمي رضوى
و كان اسم منتشر ساعة ولادتي و ماما رحمة الله عليها هي اللي سمتني كده
ومعنى اسمي\ القابلة ، المُحبة ، المُطيعة ، واسم جبل بين المدينة وينبع .

اللهم ارحمها وارحم جميع اموات المسلمين

الهم امين

يا مسهل

انا جيييييييييييييييييييييت

انا اسمى اسماء

وسمونى كده عشان اختى تؤمتى ماما سمتها على اسم اختها الله يرحمها

راحت عمتى ايام ماكانت مفتريه قالت ازاى ماما تسمى واحده راحت مسميانى اسماء على اسم بنتها الله يرحمها
يعنى اتسميت فى وقت عند بس


عشان كده انا قايبله لماما
اولا مش هسمى اسماء اموات
ولا اسامى اب وام
وانا اللى هسمى عيالى
لو هو بقى عايز يقول رايه فى الاسم اللى انا اخترته اهلا وسهلا بس الاسامى اللى انا اخترتها هى اللى هتمشى

يا ميس هداية مش لمة يجى العتريس الاول

ربنا يوفقك ويرزقك بسيف وساجدة وجنى واية وفاطمة وخديجة


كفاية خمسة

ماشى ياعم هايجى انت بس ماتفولش
وبعدين انا اللى هسمى مخلتش حد ينقيلى اسامى

ماشى يا ميس هداية ربنا يرزقك بعتريس كويس


وسمى براحتك يا ميس بس انا نقتلك احلى اسامى

سمونى كدا ليه

عشان اسمى حلو الحمد لله و كان عاجب بابا و ماما

كانو بيفكرو فى اكتر من اسم تانى

بس كل واحد اسمه بيناديله زى ما بيقولو بئى

يا رب يكونلى من اسمى نصيب زى ما كانو بيقولو العرب يا رب

موضوع لزيز يا بيبو

هو بيبو بتكون مواضيعه فى الجوووون

ميرسى يا هداية ويا وردة


بس هوة فين اسمك يا وردة انتى بتعومينى ومعرفناش اسمك برضو

عمرو داوووووووووووووووووووووووود



سموني كده علشان بيحبوا الإسم ده

طبعاً داوود مش والدي دا اسم العيله



زمان قبل ما اتولد امي ومرات عمي كانوا بيتخانقوا على اللى يسمي عمرو زي ما يكون اللى هيسمي الأول مينفعش التاني يسمي زيه فمرات عمي خلفت ولد راحو سموه محمود وامي لما خلفتني سموني كده

طبعاً معرفش معنى اسمي لكن كل اللى اعرفه ان بعشق الإسم ده لأنه على اسم سيدنا عمرو بن العاص فاتح مصر

هدورلك على معنى الاسم يا عمرو ان شاء الله .. اصل انا غاوية حكاية معانى الاسماء دى



هههههههه عايزين تعرفوه ضرورى يعنى

طب اتحايلو عليا شوية

فى ناس هنا تعرفو من ايام زمان