السلام عليكم

الاخوة الكرام ..

معلش اعذرونى الموضوع يمكن غريب شوية بس اخوكم اليومين دول بأشوف حالات كتير فى العيادة النفسية فى كذا مكان و دايما بفكر فى مسألة الزواج لهؤلاء المرضى . لأنهم فعلا حالتهم بتتحسن كتير بعد الزواج لكن بيظلوا يمثلوا شبه عبء على اسرهم فى بعض الاحيان على الاقل من حيث تكلفة العلاج المستمر فى مرض مثلا مثل الاكتئاب و نسبة الاصابه به حوالى 7% من البشر.

و مرض الفصام شائع جدا و يمثل حوالى 1% من الناس فى كل المجتمعات و نسبة حدوثه فى الرجال مثلها فى السيدات الا انها تظهر فى السيدات او الفتيات فى سن متاخرة مقارنة بالرجال.

معظم اللى شوفتهم بيكونوا غير متزوجين و السبب الرئيسى اللى هما او اهلهم بيقولوه هو انهم صعب يلاقوا حد يتحملهم او يقدر يراعى ظروفهم بل فى بعض الاحيان ينفصل الزوجان اذا ما اصيب احدهم بازمة نفسية فى مرحلة ما من حياته و يعجز شريكه ان يدعمه معنويا ..

السؤال صعب جدا . انا نفسى حتى الان لم أجد له اجابة استطيع ان اواجه بها نفسى و اقنع بها الاخرين .

يا ريت تشاركونى ارائكم و كل واحد او واحدة يقول راية و تصوره خاصة الفتيات اذا تقدم لها شخص على سبيل المثال و اعلن لها انه مثلا مريض بالفصام لكن حالته مستقرة طالما يتناول الادوية المناسبة.(اللى مش عارف يعنى ايه فصام يتفرج على فيلم احمد حلمى الجديد و هو هيفهمه كويس قوى).

السؤال صعب ..

منتظر ارائكم و اقتراحاتكم




سلاااااااام

ما شاء الله .. 5 دخلوا الموضوع فى خلال عشر دقايق و محدش منهم ع الاقل سجل صوته فى اى اختيار


قد اكون انا غلطان و فيه اختيارات اخرى مكتبتهاش و نسيتها ..

لو حد عنده اوبشن اكتر من كده يا ريت يقولوه لنا.

زي ما حضرتكم قلت بالضبط ........ الإجابة صعبة .....أنا شخصيا ملقيتش الاجابة المناسبة لي

يعني الموضوع ده صعب التنظير فيه جدا .......... لكن زي ما حضرتك قلت نسبة المرضي النفسيين عالية جدا يعني 7 % نسبة خطيرة
و أحب أقول أن دول اللي بيمشو للدكاترة او اللي امراضهم ظاهرة و تفاقمت
لكن لو جينا لنسبة حقيقية فعلية اعتقد هتكون اكبر من كده .............. انا شخصيا نظرتي للمرض النفسي انه مرض زي المرض العضوي و ان كان اشد
انا شخصيا ذهبت لطبيب نفسي من قبل و مش ضروري الانسان اللي عنده مرض نفسي يكون مجنون



لكن الاجابة علي سؤال سيادتكم بتتطلب موقف بعينه ...... يعني لو المرض لن يؤثر علي حياتنا الزوجية بشكل كبير .... و الزوجة المريضة تستطيع أداء مهامها الأسرية فلا مشكلة أبدا

ty.

بصراحة يا دكتور فانوس

لا ماقدرش

صحيح هم من حقهم يعيشوا حياتهم زي الناس الطبيعيين

بس انا حقي اعيش حياتي بافضل صورة ممكنة

يعني الواحدة بتتزوج عشان تلاقي سكن وراحة بال وسند ليها في الحياة ... نظام سبعي وجملي وكده

يعني محتاجة حد ترمي همومها كلها عليه وتقوله ويبقى هو المسئول عنها وكده

لكن المريض نفسيا بالذات غير المريض عضويا حتى

همومه كتيرة ومشاكله اكتر ومرضه غالبا بيبقى مزمن وقليل اللي امراضهم بتشفى

يعني مش بس هتشيل هم نفسها وهم اولادها طول حياتها

دي كمان هتشيل همه وهتعجز بدري وتموت من حسرتها

لان الزوج ده بيكون اقرب وأحب انسان لقلب زوجته

فتخيل احب انسان ليها بيتالم كده وبيتعذب قدام عنيها

وممكن الاولاد نفسيتهم تتعب كمان

انا مش انانية والله .. بس فعلا الزواج ده هو كل المستقبل الجاي لحد ما اموت

مش هضحي بيه لمجرد اني ابان بطلة وبضحي قدام الناس وكمان ياما ناس اسوياء وبمنتهى العقل ومتجوزوش

يعني الموضوع مش فايتال للدرجة دي

وربنا يشفي كل مرضى المسلمين يارب

صعب شوية .. خاصة أنك جبت سيرة أمراض بجد صعبة اوي

ولو أنا أتحملت .. فالمفروض في يوم من الايام يبقا فيه اولاد .. هيتأثرو قد ايه بتصرفات والدهم .. ومش بتكلم عن الوراثة .ز لكني أقصد الي اي مدي هيأثر عليهم .. ممكن يعمل فيهم ايه ؟؟



بجد صعب .. وعذرا لو مش هصوت .. لكن رأيي هنا




موضوع شديد .. ومهم جدا

مستحيل ....

مقدرش

مش راضي يحسب صوتي

اوك لو بتتعالج و محدش يعرف

أنا فعلا فى الحقيقة أعرف أنسانة عزيزة عليا جدا جدا متجوزة مريض بالانفصام
بس حقيقى فعلا بتعانى معاناه شديده جدا حاسة انها عاشت دور الراجل والست فى نفس الوقت والاب والام لأولادها
ويكفى أنها عايشة مهدده بأن أبن من أبنائها يكون مريض بالوراثة من أبوه
وغير ده كله أولادها نفسيتهم تعبت من الى بيشوفوه
المرض النفسى مرض زى اى مرض والمفروض الانسان ما يخجلش من انه مريض نفسى
والامراض النفسية مش انفصام وبس كل مرض وليه درجاته وخطورته
لكن بالنسبة ليا أوافق فى حالة ان المرض مش هايأثر عليا ولا على اولادى فيما بعد ياعنى بمعنى اصح يكون مرض خفيف وعادى
لكن مرض الانفصام بالتحديد لاء طبعا مش هوافق عاليه لانى شوفت بعينى الى بيحصل
ولنفرض مثلا وافقت يبقى بكده انا بقضى على ولادى

لكن السؤال هنا :
لو حبيتى او حبيت ولد او بنت وبعد كده اكتشفت انه مريض هاتعمل ايه ؟
هاتتخلى عن حبك ؟ ولا هايبقى فى صراع بين القلب والعقل ؟

سؤال تانى :
حط نفسك مكان ابن شخص مريض بالانفصام ايه هايكون حالك ؟ شاكلك وسط الناس ؟

سؤال ثالث :
من المعروف ان المرض النفسى نسبة الوراثة فيه قليلة الا فى حالات وامراض غير شائعة
لو حبيتى شخص او حبيت بنت وأكتشفت فى الاخر ان باباها او مامتها مرضا بالانفصام وأن فى بعض أشخاص فى عائلتها مرضى بنفس المرض
السؤال هنا :
ده معناه ان المرض وراثى فى عيلتها او عيلته وهايكونوا حاملين الجين المسبب للمرض وده ممكن ينتقل لأولادهم بعد كده
دى هاتكون وجهة نظرك ولا ايه بالظبط ؟
وايه هايكون موقفك وايه رد فعلك تجاه موقف زى ده ؟

فى انتظار الاجابة على الاسئلة

ج1:-

هيبقى فيه صراع بين الحب و العقل .

ج2:-

الله أعلم

ج3:-

مش عارف فعلا .. لكن على اى حال اذا كانت باقى الطروف ميسرة أعمل صلاة استخارة و اللى ربنا يريده

و لازم نعترف ان مفيش حاجة كاملة.


يا ريت حد غيرى يرد على نفس الاسئلة.

يااااااااه

فعلا سؤال صعب

كرأى مبدئى جدا ومن غير ما اتصور نفسى فى الوضع كله ...حاسة اه ممكن

واكيد هلاقى حاجات كتير اقولها لنفسى .



اتفق

وانتظر باقى النقاش
فعلا زى ما

من الصعب جدا ... قبول هذا الأمر ... الا اذا كان أمر بسيط

يعني حاجه بسيطة

أما لو complex فأظن ده صعب أوي

للاسف ل

ما اقدرش

شكرا على تفاعلكم و ردودكم .. و يا ريت مشاركات اكتر

يا ريت كمان اى حد يعرف حالة من اللى بنتكلم عنهم دول يقول لنا عنها .. قصدى يعنى يحكى لنا مثلا المريض النفسى اللى هو يعرفه عمل ايه لما جه يتجوز .. بمعنى هل راح من الباب للطاق كده و قال لهم يا جماعة انا مريض نفسى و عاوز اتجوز بنتكم .. و لا اكتفى بمجرد التلميح و لا سكت خالص كما يفعل المعظم ..

يا ريت نشارك فى النقطة دى و تقولوا ارائكم فيها حتى لو متعرفوش حالات ..


اشكركم

ده راىى برده

لكذا سبب


ان البيت هو سكن الانسان


فاتوقع فييه الهدوء والاستقرار


التانى

لان دى هتكون ام اولادى ومربيتهم



دول اهم سببين عندى

شكرا على مرورك دكتور / الغريب

بس يا ريت تسجل رايك فى الاستبيان فى اول الموضوع

فكرتني بهل تقبلين حسب الله بعلا لكي ؟؟؟؟؟؟؟


بصراحة سؤال غريب


ومعتقدش ان حد ممكن يجاوب اجابة صادقة

لان دي حالة بتختلف لكل انسان

انا ممكن اوافق دلوقتي بالكلام

وارفض في الواقع

أو العكس

بس قبل مقول رأيي احب اسالكم

مين فينا ممرش بمرض نفسي طول حياته؟


مستحيل تلاقي واحد خالي من الامراض النفسية طول حياته

بس للاسف احنا اللي راسخ في ذهننا المرض النفسي بصورة كوميدية أنه واحد شعره طويل قاعد علي جنب

وبيصوت في وش اللي بيكلمه وهوا مبررررررق


انا شخصيا مريت بأزمااااات نفسية عديدة بعتبر كل مرحلة منهم مرض نفسي

بس الحمدلله قدرت اتغلب عليهم قبل محتي أقرب الناس ليه يعرفوا الازمات دي

انما فيه ناس مبتقدرش تسيطر علي أزمتها

وتخرجها في حدود الاصدقاء اوالعائله

أنما في الحالات المستعصية بتخرج حدود الازمة عند السيطرة وفي الحالة دي معتقدش ان صاحب الازمة

نفسه مهيأ لأي زواج سواء عن حب او غيره

ايه يا خواتي العقل ده

دكتورة صحيح

أنا ماعرفش كتير عن الاسرة الى حكيت عنها قبل كده بس أنا هاقولكم الى أعرفه
فى البداية خالص واحد طبيعى جدا أتقدم لواحده الولد كان على خلق ودين بصراحة ولحد انهرده بجد انسان محترم جدا بس للاسف والده ووالدته ماقالوش انه مريض نفسى وأخواته نفس الموضوع محدش فيهم قال انه مريض بعد الزواج بكام يوم كده الشخص ده تعب جدا وطبعا مراته مكنتش تعرف عن مرضه حاجة خالص فوجئت بأنه مريض وأتضح ان مرضه هو الانفصام بس مرضه مش مستمر بمعنى أنه مع الفرح الشديد أو الحزن الشديد بتيجى زى حالة أو نوبة مرضية تحس أنه أتحول لشخص تانى غير الشخص الى أنت تعرفه طريقة كلام مختلفة وشخصية تانية خالص مع العلاج بيرجع تانى لطبيعته بس بياخد فترة
هم دلوقتى عندهم أولاد بس للأسف الشديد الاولاد مش قادرين يتقبلوا فكرة أن الناس عرفت أن باباهم مريض نفسى ده لان المرض النفسى مرض مش بيستخبى كتير أفتكر مرة بنته صاحبتها مرة قالتلها يابنت المجنون البنت اعدت فترة نفسيتها تعبانة جدا
بس مراته سألت عن المرض ده هل هو وراثى ولا لاء
الدكتور أكد ان المرض النفسى ممكن يكون وراثى بس نسبة الوراثه فيه قليلة جدا وبيبقى حسب الضغط النفسى بمعنى ان كل انسان بيحمل جين وراثى من الام ومن الاب بس كل مافى الموضوع أن لو الطفل وقع تحت ضغط نفسى شديد جين المرض ده بينشط وبالتالى بيكون عرضا لوراثة المرض
وفعلا أتضح أن الشخص أو الاب نفسه وقع تحت ضغط نفسى شديد جدا ولمده طويلة جدا وهو ده كان السبب فى مرضه
لكن بالنسبة لحياة الاسرة هى أسرة عادية فى الاوقات الى الزوج مش بيكون فيها مريض بس برده الزوجة مطلوب منها انها تهىء جو مناسب للزوج ومطلوب منها برده ماتضغطش على اولادها خوفا عاليهم من المرض
وهى أخدت الاولاد عند كذا دكتور نفسى وأكد أنهم أصحاء جدا وأنهم طبيعين زى اى اطفال
وانا برده عرفت من الزوجة معلومة كده الدكتور قالها عاليها قال المرض النفسى بيقل بالذات الانفصام من بعد سن 35 سنة بس شرط الالتزام بالعلاج وفعلا الكل ملاحظ ان الشخص ده مع التزامه بالعلاج بيكون انسان عادى جدا وطبيعى جدا جدا
وعايزة أقول معلومة بجد حقيقية أن مافيش انسان كامل
على الرغم من ان الشخص ده مريض نفسى بس كل الناس بتشهد ليه انه محترم جدا وانسان خلوق اوى ويكفى ان والدة ووالد الزوجة بيأكدوا أنه أحسن واحد فى اجواز بناتهم
وأنا لما رفضت فكرة انى اتجوز مريض نفسى ده لانى شوفت الى بيحصل وشايفة الضغط الى على زوجة الشخص ده يمكن هى استحملت الزوج وده علشان فعلا بتحبه جدا فابالنسبة ليا أنا لو حبيت شخص حب يخلينى استحمل منه اى حاجة مش هايكون عندى مانع بس حتى دى بعيده أوى لانى ضد فكرة الحب قبل الزواج لانه حب على كف عفريت
بس فعلا أتجرحت أوى لما فوجئت بمرض زوجها وانها ماتعرفش عن مرضه حاجة كان المفروض يكون فى صراحة شوية لانه مش يوم او اتنين ده عمر كامل هايقضوا سوا

بس ليه مافيش حد جاوب على أسئلتى ياريت تجاوبه عاليها لانى احب اعرف وجهة نظركم فى النقط ديه ؟
وبالنسبة لأجابات الاخ فانوس رمضان ياريت حضرتك تجاوب أجابة وافية شوية مع شرح اسباب رفضك او قبولك وليه انت مش عارف وايه الى هايخليك فى صراع بين قلبك وعقلك

أسفة جدا جدا على الاطالة

هو الموضوع صعب أوي بصراحه

بس انا عن نفسي



حتى لو المرض وراثى و بنحب بعض هنتجوز !!

مستحيل لو كان المرض من الامراض القوية زي الفصام

والحاجات الجامدة اللي في اول الموضوع...

بجد اتمني والله ان ربنا يشفيه

بس انا مقدرش...



انما لو مجرد ازمة نفسية

بتاخد وقتها وبتروح

ليه لا...

كلنا اكيد مرينا بازمة نفسية

موضوع مهم واكثر من رائع

المرض النفسي يتوقف على مدى خطورته

فمحدش فينا مابيمرش باضطرابات نفسيه

وحسب درجة المرض ممكن اتقبل الزواج من الانسانه اللي قدامي

للاسف الناس بتنظر للمرض النفسي على انه وباء واللهم احفظنا والكلام ده

انا مابنظرش كده خالص

لانه مرض زي اي مرض عادي وله درجات على اساسها احكم على اللي المفروض يحصل

بشكركم على اهتمامكم و ردودكم على الموضوع و طبعا باشكر مراقب الساحة على تثبيته ..

بعضكم فى الردود اشار الى اننا كلنا بنمر بازمات نفسية و ده يعتبر شىء طبيعى بينتهى بانتهاء اسبابه لكن انا

عاوز اشير الى نقطة معينة و هى انى اقصد زواج المريض النفسى " المزمن "

بمعنى المريض اللى عنده مرض نفسى مستمر على طول زى الفصام او الاضطراب الوجدانى .. مع العلم انه مش بيكون سلوكه عدوانى او اهبل او مجنون زى ما البعض فاكر .. لكن الصراحة المرض بيكون موجود باستمرار و مختفى تحت تاثير الادوية ..

يا ريت نشوف مشاركات اكتر لان الموضوع بجد مهم جدا و انا فى بداية الموضوع حددت لكم حجم المشكلة بالارقام

يعنى تخيلوا لما الفصام نسبته 1 % من الناس ده معناه ان مصر فيها حوالى تلات ارباع مليون مريض بالفصام .. هل من حق هؤلاء الزواج ؟ ام لا ؟ ام يتزوجوا من هم مثلهم لتصبح الاسرة فى حالة عجز كلى ؟
انا بحثت كتير فى الموضوع ده الى ان استقريت على كتاب متخصص فى تلك الاحوال . الكتاب اسمه " الطب النفسى و القانون" بيناقش حقوق المرضى النفسيين و من ضمنها الحق فى الزواج .. لكنه بيناقشه من ناحية القانون و الشرع .. احنا عاوزين نعرف اراء الناس اجتماعيا ..

و باكرر تانى ..

نقصد المريض النفسى المزمن .. الذى لا تختفى اعراض مرضه الا بالعلاج .. و يبقى احتمال توريث المرض للابناء اذا ما تعرضوا لضغوط نفسية فى المستقبل و ما أكثر الضغوط فى عصرنا الحالى.

منتظر ارائكم

بالنسبه للزواج بشخص مريض بالفصام صعب جدا
وبعدين الموضوع ده بيختلف من بنت للتانيه
يعنى فى بنات عندها قدرة تحمل شخص عنده الفصام او اى مرض نفسى شديد
وبنات بتكون تعبت فى حايتها وبتبقى عايزه تستريح فى بيت زوجها بأنه يتحمل المسؤليه وتكون مش شايله هم اى حاجه
اما لو كان مرض نفسى عادى يعنى غير مؤثر زى الكئابه مثلا يبقى مفيش اى مشكله اهم شىء ان البنت دى تقدر تتحمل

???

ما اقدرشي اتزوج واحده مريضه نفسيا
هوه صيحيح لازم يعيشوا زيي باقي الناس ما هيا عايشه
بس متزوجشي واحده مريضه نفسيا
انما لو مثلا ربنا عفاها وبقيت كويسه
ممكن عادي بقي مفيش مشكله
وعلي فكرة التوبيك ده اكثر من رائع

لا بصراحه ما اقبلش

الا اذا كنت واثقه ان قديره على التواصل معاه

او على الاقل ممكن اكون سبب فى شفاءه مش انتكاسته

اصلى بحس ان كل واحد فينا مريض نفسى

لكن اللى بيكون زايد بيكون محتاج حد معين حد خاص

وبصراحه اعتقد ان فى ظروف مجتمع مزدحم ملئ بالطفرات الجسديه والعصبيه

صعب اوى ان حد يستحمل حد

هقلبها انا وهو مورستان

شكرا على مرورك يا اكشن يا رايق


و شكرا على المجاملة الحلوة دى !!

رجاء يا جماعة اى حد يدخل الموضوع ياخد باله من حاجتين

1- يسجل رأيه فى الاستبيان اللى فى اول الموضوع خالص .

2- ياخد باله اننا نقصد المريض النفسى المزمن زى ما قلت قبل كده .. اللى هو عنده فصام مثلا ( زى فيلم احمد حلمى الجديد) و هو بصراحة فيلم رائع جدا خالى من الاسفاف و بعيد عن الخلاعة . و برضه نبقى فاهمين ان المريض ده طالما بياخد الادوية بتاعته فهو بيكون فى حالة عادية جدااا .. لكن و أأأه من لكن .. المرض يمكن أن يورث للأبناء إذا تعرضوا لضغوط نفسية ..

منتظر مشاركاتكم .. و محدش ينسى يسجل رايه فى الاستبيان.

طيب أنا عايز أشير لنقاط فى عجالة

1- فرق كبير بين المرض النفسى ( وهو زى أى مرض عضوى نتيجة لاساءة استعمال الجسد فى تفاعله مع الحياة ، يعنى زى ما ممكن بسبب اساءة استعمال جهازى الهضمى بتناول الطعام بصورة خاطئة أصاب بأمراض هضمية ، ممكن بسبب اساءة استعمال عقلى وتفكيرى تجاه أمور الحياة أصاب بمرض نفسى أو عقلى بمعنى تغير فى فسيولوجيا المخ ، - هذا الى جانب عوامل الوراثة - وكلاهما قابلين للعلاج بالأدوية وبمعالجة الأسباب الخاطئة التى أدت لحدوث المرض !)

وبين اضطرابات التكيف ( بمعنى الفشل فى التكيف مع التغير فى ظروف البيئة لفترة محدودة ، زى الهجرة أو الفشل أو وفاة عزيزأو الانفصال أو دخول الجامعة وما قد يتلوها من مشاعر الاحباط وقلة النشاط ، وده كلنا بنتعرض له بدرجة أو بأخرى )

طيب ازاى أفرق بين المرض النفسى وبين اضطراب التكيف !؟

اضطراب التكيف يكون لفترة محدودة بعد كده ينجح الانسان فى التكيف ، أما لو العملية طولت هيدخل فى مرض نفسى سواء اكتئاب بسيط
اضطراب التكيف يكون لفترة محدودة بعد كده تمضى الحياة بصورة طبيعية ، لو طوّل يبقى دخلنا فى مرض نفسى من اكتئاب بسيط لاكتئاب مركب الى الى على حسب الظرف وطبيعة الشخصية وظروف البيئة


2- هل المريض النفسى مش انسان ومش من حقه يعيش حياة طبيعية ويتجوز !؟

مين قال كده من حقه يعيش حياه طبيعيه على حسب وصوله للحياة الطبيعية ، يعنى لو فرضنا أن مريض مصاب بمرض فى القلب يؤثر على حياته الطبيعية ويعالج منه يقدر يتجوز ولا لأ !؟ الطبيب يقدر حالته وصارحه وهو يصارح زوجته ويصدروا قرار منطقى ..

بالمثل للمرض النفسى على حسب الحالة وتشخيص الطبيب ومدة العلاج وفرص الانتكاسة ..

طيب فين المشكلة

لا دى فى مشكلة كبيرة قوى

ايه هى

دى نقطة 3


3- فى كثير من المجتمعات يتم اعتبار الزواج علاجا لكثير من الاضطرابات والأمراض النفسية ، فى الغالب بديل وأحيانا مكمل للعلاج النفسى المختص

جوزوه يمكن يتعدل وينصلح حاله

أشهر الأمراض : الاكتئاب - الفصام - الاضطرابات الجنسية وخاصة اضطراب الهوية الجنسية وادمان الجنس

وده خطأ كبير بتدفع ثمنه الأسرة كلها مش الزوج المريض بس ، وده غباء وجهل بصراحة

الصراحة راحة


الخلاصة ببساطة

المرض النفسى مرض زى أى مرض قابل للعلاج ، والطبيب يقدر الحالة ويحكم بصلاحيتها للزواج أم لا ، والزواج لا يعتبر بديلا للعلاج المختص

أمال ايه الرغى اللى فوق ده كله اذا كانت دى الخلاصة

لما متاخدش فى بالك حبيت أختبر سرعة كتابتى على الكبورد بس ! السلام عليكم .

و عليكم السلام و رحمة الله و بركاته.

ان شاء الله يا جماعة هيكون فيه طبيب نفسى يرد على الاسئلة دى كلها بس فى نهاية الموضوع . و اللى عنده اى استفسار يقوله هنا و ان شاء الله هيتجاوب عليه .

اوعوا تفتكروا انها اشتغالة منى .. ده طبيب كبير جدا و اشتغل فى امريكا و بريطانيا و دول اخرى كتيرة ..

بس عاوزين شوية تفاعل منكم ..

للاسف مقدرش


لان الحياة مش انا وزوجي وبس


هيكون في اطفال ودة هيأثر عليهم

يا جماعة عشان خاطرى اللى يدخل الموضوع يسجل رايه فى الاستبيان اللى فى الصفحة من فوق

مينفعش كده اكتر من 200 واحد دخلوا الموضوع و مفيش غير 20 بس اللى سجلوا رايهم

يا ريت نبقى ايجابيين اكتر لان الموضوع ده هياخد بعد مختلف اذا عدد المشاركين فيه زاد او على الاقل عدد اللى سجلوا فى الاستبيان

مش عارفه بس لو حاجه بسيطه اه اوافق عادى واساعده من كل قلبى كمان

بس لو حاجه مش بسيطه الصراحه مش عارفه بس غالبا لا مينفعش بس الواحد مش عارف ربنا كتبله ايه

وموضوع جميل تسلم ايدك وجزاك الله خيرا

انا حطيت صوتى بس مش متاكده اوى

لو عايزه تتأكدى شوفى كده حنب كلمة توقيع هتلاقى متهيألى مشاهدة الاصوات مش فاكره هيقولك تم احتساب صوتك

السلام عليكم و رحمة الله و بركاته

الموضوع ده ممكن يتقسم 4 أقسام بالنسبة لي

أولا : لو الزوج مريض نفسيا من قبل الزواج

طبعا لن أقدر أرتبط بيه لأن الحياة ليست أنا و هو فقط بل هناك أطفال و طبعا أكيد الأطفال هيتأثروا بمرض والدهم

ثانيا : لو إتجوزت و الزوج حاءه هذا المرض بعد فترة بعد الزواج بفترة طويلة

بصراحة أنا لن أتركه و خاصة إذا كان بار بي و سأرضى بما قسمه الله لي و أساعد زوجي على تجاوز المحنة و أهتم بتربية الأولاد بحيث لا يتأثروا بمرض الأب

ثالثا : لو تزوجت بزوج مريض نفسي و لم أعلم

أتركه فور علمي و أطالب بجميع حقوقي

رابعا : لو تزوجت وبعد فترة قصيرة من الزواج مرض الزوج بهذا المرض

الأمر سيكون صعب من حيث تحديد الرأي النهائي و بالتالي سألجأ إلى من هو أكثر خبرة مني

مريض الفصام شخص عادي يتناول الادوية

و لكن قد يعاوده المرض بعد فترة

السلام عليكــم ورحمـة الله وبركاتــة ،،

الزواج قسمه ونصيب

والله بيده الشفاء

ولكن علينا فى إختيار الزوج أو الزوجه بما أرشدنا به المختار (ص)

"إذا جاءكم من ......ترضون دينه وخلقه

"وتنكح المرأه لاربع فاظفر... بذات الدين

حزاكم الله خيرا

لا انا كدا فهمت الموضوع غلط يا دكتور فانوس

اذا كان مرييض نفسي مزمن

لازم افكر

لأني مش بس بختار زوج لنفسي

لأ

انا بختار اب لاولادي

وصهر لعائلتي

وفي الحالة دي تكون انانية مني لو اخترته رغما عن انف الجميع

ملحوظه:

والله انا صوتت فوق متزعقش بقي

شكرا جدا وانا اتاكدت

معذرة يا فندم

شكرا لكل اللى شاركوا حتى الان

كل ما اجي اصوت برايي في الاستبيان
الصفحه تقفل معلش بقي