السلام عليكم ورحمة الله وبركاته

بفضل الله وحده... لا إله إلا هو سبحانه...
يسر أخوتكم بالقسم الدعوي..
هذا لك !
أن يقدموا لكم:


نسأل الله أن ينفعنا بها
وتكون خطوات صحيحة علي الطريق القويم...

والله المستعان

طيب
أولا إيه هي حلقات شباب الصحوة ؟؟

هي خطوات ممنهجة - يعني منهج يعني - نسعي فيها إلي تزكية نفوسنا بإذن الملك تعالي
يعني إن شاء الله نسعي لرفع مستوانا الإيماني...

هنبدأ إن شاء الله بالتحدث عن نقط مهمة جدا...
أولا عن التوبة
ثانيا عن النية الخالصة والهدف المحدد والهمة العالية
ثالثا أمور مهمة قبل المنهج
خامسا المنهج
ثم نستمر إن شاء الله في التحدث معا عن العبادات التي سنلتزم بها إن شاء الله تعالي

طيب جميل جدا..الحمد لله

إن شاء الله نبدأ أول حلقة المشاركة القادمة...
تابعونا ...
((أتمني يا شباب تنشروها في المنتديات اللي تعرفونها علشان آخد ثـ..قصدي علشان نفيد كل الشباب

السلام عليكم ورحمة الله وبركاته


لماذا التوبة ؟؟
دلوقتي احنا عايزين نرتقي بأنفسنا..تمام ؟؟

طيب
أنت قلبك ده إناء...هتصب فيه العلوم وهترتقي به عن طريق العبادات...تمام ؟؟
قبل ما نصب حاجة في الإناء..لازم يكون الإناء إيه ؟؟ نظيفا !

يعني لازم ننظف الإناء علشان لما يبقي التربة الصالحة اللي هنستخدمها طول رحلتنا إن شاء الله
تمام ؟
لو بننظف الإناء بالليفة والصابون السائل ((بريل مثلا))...قلبنا هننظفه بالتوبة...
هننظف قلبنا بالتوبة إلي الله جل وعلا..

وحاجة كمان...
احنا عايزين نشتغل علي منهج تزكية...واحنا عارفين إن الإيمان يزيد بالطاعة وينقص بالمعصية..
مش هينفع نزود إيماننا بالطاعات والنوافل والسنن واحنا أصلا عندنا فروض لم نؤدها ومعاصي نرتكبها !!
صح ولا لأ ؟
يبقي لازم قبل ما نبدأ في الارتقاء إن شاء الله نتوب عن المعاصي اللي عندنا...ونتوب عن الفروض اللي أضعناها من قبل..

هنتوب إزاي ؟؟
شروط التوبة اللي عارفينها كلنا..
منها:
الأول : الإقلاع عن الذنب فوراً .
الثاني : الندم على ما فات .
الثالث : العزم على عدم العودة .
الرابع : إرجاع حقوق من ظلمهم ، أو طلب البراءة منهم .

حلو أوي..
يبقي لازم نسعي لتحقيق هذه الشروط الأربعة...علشان ربنا يتقبل توبتنا بإذنه وفضله...

فيه كمان شوية موانع ممكن تحول بين العبد وبين التوبة...((علي فكرة من كتاب كيف أتوب لشيخنا محمد حسين يعقوب))

بس مش هنقولها كلها..

أولا: الجهل بالله...
لأن كل ما يعظم قدر الله عز وجل في قلبك تصغر نفسك ..

ثانيا: البدعة
العمل الصالح عامة بيكون له شرطان : الإخلاص والمتابعة
الإخلاص يعني نيتك تكون خالصة لله تعالي...مش بتعمل كده علشان حاجة تانية..مش نيتك ترائي الناس...مش نيتك سمعة ولا منصب ولا شهرة ولا حاجة إلا وجه الله تعالي...

والمتابعة يعني تقتدي في كل أعمالك برسولنا الكريم محمد صلي الله عليه وسلم...مش بنألف من عندنا يعني...خوفا من الابتداع ((كل خير في اتباع من سلف وكل شر في ابتداع من خلف))

ثالثا: الكبائر الباطنة:
يعني أمراض القلوب اللي بتبقي جوانا واحنا مش واخدين بالنا...
لأن احنا مش بتأخد بالنا غير من المعاصي اللي بنعملها بجوارحنا...مع أمراض القلوب دي من أخطر الأشياء
زي مثلا أن الواحد يكون عنده كبر..أو عجب بالنفس...أو رياء للآخرين...أو خيلاء...أو حسد...أو غرور...إلخ..

رابعا: الكبائر الظاهرة :
ومش لازم يكون الحائل بين العبد والتوبة هو فقط الكبائر المعروفة ((القتل والزنا والخمر و و..))
لأن كما يقال: لا صغيرة مع الإصرار ولا كبيرة مع الاستغفار
فإياك أخي الحبيب والإصرار علي ذنب ولو كان عندك صغيرا..
ولا تنظر إلي صغر المعصية ولكن انظر إلي ؟؟ انظر إلي عظمة من عصيت..

خامسا: التوسع في المباحات:
يعني تكون الحاجة مباحة ، لكن بنسرف فيها فتطغي علي حاجات أهم وأولي لدرجة أنها تطغي علي الفرائض
زي اللي بينام كتير..يقع منه قيام الليل..وشوية شوية ينام عن صلاة الفجر...

دي بعض وليس كل الحوائل اللي تحول بيننا والعياذ بالله وبين التوبة...

فيه كمان حاجات نحتاجها علشان ربنا يرزقنا التوبة النصوح..
إيه هي الحاجات دي ؟؟

نحتاج للاستعانة بالله...
القصة الشهيرة..إذا كنت ماشيا في طريق...ولقيت كلاب بتنبح عليك...بتهوهو يعني..تعمل لها إيه ؟؟
هتهشها
هتمشي وتيجي تاني تنبجح عليك...هتهشها تاني..
طب ليه كل ده ! من الأول: استعن بالراعي يكفيك كلابه...الراعي صاحب الكلاب هو أقدر أنه يمنع كلابه عنك..صح؟
ولله المثل الأعلي
أنت مش هتقدر تدفع الشيطان لوحدك..لازم تستعين بالله...
كل ما تلاقي الشيطان يوسوس لك بمعصية استعذ بالله علي طول منه...بس بصدق مش مجرد كلمة وخلاص تأدية واجب..

نحتاج لمحاربة الهوي والنفس والدنيا والشيطان...
نحارب الهوي بمخالفته...خالف هوي نفسك حتي لا يهلكك !
نحارب النفس بقوة الإخلاص...أخلص نيتك لله واقتل نفسك الأمارة بالسوء !
نحارب الدنيا بالزهد فيها...اجعل همك الآخرة تأتيك الدنيا ذليلة !
نحارب الشيطان بالاستعانة بالله...إياك والركون لنفسك فأنت ضعيف !

نحتاج للتعب...لازم نتعب..
أصل مش معقولة يا شباب نقعد نتعب نتعب في الدنيا ولا نتعب أبدا من أجل الله تعالي !!
احنا هدفنا إيه أصلا ؟؟ مش الجنة ؟؟ أيوة طبعا !!
أمال ليه دائما في نواحي الدين نبقي نايمين ؟!..ليه همتنا عالية في كل حاجة إلا دي !!
خالف نفسك حتي تفوز برضا الله..

تعالوا يا شباب نبدأ عهدا جديدا..
تعالوا نبدأ من اللحظة دي بأسلوب مختلف..
تعالوا نخللي الإجازة دي مختلفة...
تعالوا نركن الدنيا علي جنب ونشتغل شوية لآخرتنا...

يللا يا شباب..
هنبدأ بالتوبة..
واجبنا المرة دي هو التوبة...هنتوب عن كل المعاصي اللي عندنا مجملا...
ولو فيه ذنب معين لازق فينا مش عارفين نتخلص منه المرة دي هنتوب منه بجد..

وهنقف بين يدي الله تعالي في الثلث الأخير ونتضرع ونبكي ونشكو حالنا لمن هو أعلم بنا سبحانه...

إن شاء الله من اليوم وعلي مدار الكام يوم الجايين دول هنطبق كل الكلام اللي كتبناه هنا..ماشي ؟؟ اتفقنا ؟؟
وهنخلع الحجب اللي بيننا وبين التوبة ونحرقها عن آخرها...


يعني هنوقد همتنا...
ونهتم بآخرتنا..
وبإذن الله هنبدأ علي نضيف..
..
ومش هننسي هدفنا يا شباب...

إنهـــــــــــــــــا جــــــــــــــــنة !!!

ميرسى على الموضوع

بس ياريت تكملوه و محدش ينساه

ماتخافيش ياحبيبتى

باذن الله مش هيتنسى


بس انتى تابعينا

السلام عليكم ورحمة الله وبركاته

إزيكم يا شباب
أخبار الحلقة اللي فاتت إيه ؟؟

حليتم الواجب ولا لأ ؟؟

الحمد لله بعد ما تبنا إلي الله تعالي ..كان فيه حاجة نسيت أقولها صحيح..
دائما لازم نفتكر نجدد التوبة..مش بنتوب مرة وبعد كده ننام..لأ ،
يقول رسولنا صلي الله عليه وسلم: ((والله إني لأستغفر الله وأتوب إليه في اليوم أكثر من سبعين مرة)) رواه البخاري.

طيب جميل جدا...دلوقتي بقي عايزين نتكلم عن

الحلقة الثانية
شباب الصحوة
صيف 2006

الحلقة دي هتكون جميلة إن شاء الله...هتكتشف فيها حاجات حلوة في نفسك.. :rose2:

قلنا علشان نبدأ صح لازم نبدأ علي نظيف...علشان كده ذكرنا التوبة..نسأل الله تعالي أن ينفعنا بما نقول..
وبعد كده في بداية طريقنا علشان نقدر نستمر بإذن الله هنحتاج لثلاث حاجات متلازمة..

نية خالصة
هدف محدد
همة عالية

الثلاثة بيكونوا مع بعض..لأن أنت علشان تعلي همتك في الطريق لازم يكون لك هدف واضح محدد ونية خالصة تستحضرها..
ونيتك أصلا هتكون مناسبة للهدف بتاعك...و الهدف لازم يكون خالصا لوجه اله تعالي

شفت بقي كلهم مرتبطين ببعض إزاي..

طيب إزاي هنجيب الثلاثة دول ؟؟

تعالي نبدأ بموضوع الهدف...

لو سألت أي واحد تعرفه إيه هدفك..ممكن يسكت ما يعرفشي يرد..وممكن يقعد يحكي لك كتير..
أنت بقي إنسان مختلف...هدفك لازم يكون محدد ، حتي لو هدف عام..ولازم يكون هدفا ساميا..يعني إيه ؟؟

يعني باختصار لما أقول لك إيه هدفك تقول لي أنا هدفي رضا الله ومن ثم الجنة...

رضا الله ومن ثم الجنة !!
كلمة بسيطة..لكن هدف عظيم !
ولو دققت هتلاقي أنه هدف واضح ومع ذلك فهو شامل..

يعني أنت عايش لهدف محدد...أنت عايز تنال رضا الله تعالي...وطلبك طلب محدد..اللي قلناه الحلقة اللي فاتت..أنت طلبك الجنة..

رائع !
تصور بقي لما يكون كل عمل بتعمله هدفك فيه رضا الله...أي عمل مهما كان صغيرا,...
كل ما تيجي تبدأ في حاجة تفتكر هدفك ده ...
ما شاء الله..بالله عليك مع هدف راق زي ده إزاي هتفقد الأمل ؟؟؟

أنا هدفي رضا الله سبحانه..وطلبي جنته بل الفردوس الأعلي
هدف صحيح وعظيم ، هدف واضح محدد وفي نفس الوقت شامل وعام

وعلي فكرة...هدفنا ده كده هنسميه "الهدف البعيد"...يعني الهدف العام من حياتك ..((مش معناه بعيد يعني صعب ، لأ بعيد يعني يعني هدفك الأصلي ))
يقول الله تعالي: ((وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ ))[الذاريات : 56]..يبقي الهدف من خلقك أصلا أنك تعبد ربنا سبحانه..
علشان نقدر نوصل بإذن الله للهدف البعيد ده هنحط شوية أهداف قريبة...دي بقي أنت تحددها مع نفسك..
يعني زي مثلا ما تقول : أنا إن شاء الله هأحفظ سورة البقرة خلال الصيف ده..أو إن شاء الله هأخلص الكتاب ده خلال الأسبوع الجاي..وهكذا..
بتحط أهداف كتيرة قريبة بحيث أهدافك القريبة دي هتمشي عليها علشان توصلك لهدفك البعيد إن شاء الله..فهمت قصدي ؟

وكمان أنت ممكن تحول أي عمل بتعمله بحيث يتلاءم مع هدفك ده..يعني أنت مثلا بتذاكر علشان تنجح ..أو بتشتغل علشان تجيب فلوس...كل ده ضروري ومطلوب..ولو استحضرت له نية كويسة هتلاقيه مش متعارض إطلاقا مع الهدف بتاعك..

أنت بتذاكر علشان تنجح..وعايز تنجح علشان تقدر تفيد المسلمين بعلمك ده...وتقدر تكسب بعدها من عمل جبينك...وترضي والديك..
أنت بتشتغل علشان تجيب فلوس...علشان تقدر تشتري الأكل والشرب واللبس وكل المتطلبات ليك علشان تعينك علي طاعة الله تعالي...وكمان لو مسئول عن أسرة تخيل بقي الثواب اللي بتأخذه بإذن الله

وهكذا...
شفت دخلنا في موضوع النية واحنا مش واخدين بالنا..
يعني بندور احنا نيتنا إيه من العمل اللي بنعمله ده...ليه بنعمله ..عايزين منه إيه..

من هنا ورايح هتخللي كل عمل بتعمله - برضه مهما كان صغير - نيتك فيه نية صالحة...
يعني لو أنت كنت مقبلا علي حاجة معينة عايز تعملها...قف مع نفسك ثواني بسيطة قبل ما تبدأ فيها..فكر كده...أنت بتعمل العمل ده ليه ؟؟
هل نيتك فيه صالحة وخالصة ولا يشوبها هوي نفس أو إغراءات شيطان ؟؟
ما احنا اتفقنا بقي من المرة اللي فاتت أننا لازم نتخلص من هوي النفس ومن وساوس الشيطان..مش هأقعد أعيد بقي ((لو مش فاكر ارجع بص في المرة اللي فاتت علشان ما أطولشي عليك ))

أنت عارف ليه أنا كل شوية أقول لك "مهما كان عملك صغير " ؟؟؟
اقرأ وأنت تعرف...يقول الله تعالي: ((فَمَن يَعْمَلْ مِثْقَالَ ذَرَّةٍ خَيْراً يَرَهُ (7) وَمَن يَعْمَلْ مِثْقَالَ ذَرَّةٍ شَرّاً يَرَهُ (8) ))[الزلزلة : 7 و 8]
شوف يا أخي...مثقال ذرة ... فقط مثقال ذرة...
وبعدين أنت متعرفشي العمل بتاعك ده قد يكون صغيرا ولكن بسبب نيتك الخالصة ربنا يعطيك به ثوابا كبييييرا ..

صحيح..كويس أني افتكرت..
شرط مهم جدا في النية أنها تكون خالصة...
يعني متجيش مثلا تقول أنا هأصلي علشان ربنا أمرني بالصلاة وأنت في قلبك بتصلي علشان مثلا أصحابك يقولوا ده بيصلي...
لازم نيتك اللي هتستحضرها في أعمالك تكون نية خالصة لوجه الله تعالي...وبعدين أنت عارف ، أي نية هتكون مش خالصة مش هتنفعك...يعني أنت هتستفيد إيه مثلا لما حد يقول عنك حاجة كويسة..مش هتفرق معاك ، أهم حاجة أن ربنا يكون راضيا عنك...مش ده هدفنا ولا إيه ؟؟

حلو أوي..
علشان ما أطولش عليك بقي نشوف موضوع الهمة العالية...

ولا بص...نخللي دي الحلقة الجاية ؟؟
ماشي يا حبيبي في الله...

كفاية كده المرة دي...

أوعي تنسي..
يبقي احنا المرة دي اتكلمنا عن الهدف بتاعنا...الهدف العام البعيد والأهداف القريبة...وأنها لازم تكون أهداف محددة ومتناسبة مع هدفنا الأصلي ..
واتكلمنا عن النية الخالصة..أننا لازم نستحضر نية صالحة في كل عمل نعمله مهما صغر..ونجدد نيتنا علي طول..وتكون نية خالصة لوجه الله تعالي
وعرفنا أن النية والهدف بيكملوا بعضهم..

إن شاء الله بقي الكام يوم دول لغاية الحلقة الجاية عايزك تأخد واجب أنك تكتب في ورقة كده إيه هو هدفك العام الأصلي...اللي هو رضا الله تعالي والفوز بجنته...
وحط ليك شوية أهداف قريبة تسعي لتنفيذها خلال الأسبوع الجاي مثلا..أو حتي علي مدار الصيف..شوف حسب ما يناسبك..

تاني واجب أن اللحظة دي هتكون نقطة تحول فعلية في حياتك...هننسي كل أهدافنا ونوايانا التعبانة...ونضع أمامنا الهدف الرئيسي بتاعنا..

ثالثا يا أخي أنك من هنا ورايح كل عمل هتعمله قبل ما تبدأ فيه هتستحضر نية صالحة وخالصة علشان ربنا يجعل العمل ده في ميزان حسناتك...وهتشيل من دماغك أي شوائب لنيتك دي ومش هتحتفظ إلا بالنية اللي ترضي الله تعالي..
وكمان تحاول تستحضر أكثر من نية علشان تأخد ثواب أكبر بإذن الله...

ماشي يا أخي الحبيب ؟؟
والله يا أخي أنا أحبك في الله...

يللا
خللي بالك أنا هأسأل علي الواجب المرة الجاية..
ربنا يحفظك يا أخي...

لسلام عليكم ورحمة الله وبركاته

أنا جيت
إزيكم يا شباب

أخبار الهدف والنية إيه ؟؟ تمام ؟؟
بتحلوا الواجب ؟؟

قدرتم تجددوا نيتكم بحيث تبقي علي طول ملائمة للهدف بتاعنا ؟؟
ما شاء الله

أنا عارف أنكم قدها بإذن الله

طيب
زي ما وعدتكم..النهاردة إن شاء الله كلامنا هيكون عن علو الهمة..

شباب الصحوة
الحلقة الثالثة
Summer 2006

يللا نبدأ

الأول بس علشان محدش يتوه... أنا أقصد بعلو الهمة يعني الهمة العالية..شفت سهلة إزاي ؟
أنا أقصد الهمة العالية يعني أنك علي طول تكون متحمس لتحقيق هدفك... مش هتكسل عنه...مش هتنساه...مش هتغفل..
مش هتيأس أبدا بإذن الله..

يعني عايزن من الآخر :
همم تصارع قمم الجبال..

قبل ما نقول أي حاجة لازم تعرف وتوقن كمان أن علو الهمة دي هبة من عند الله ونعمة غالية تستوجب أن نشكره ونحمده تعالي عليها..
لأن ربنا سبحناه وتعالي بيقول: (( لَئِن شَكَرْتُمْ لأَزِيدَنَّكُمْ )) (سورة إبراهيم - من الآية 7)
يبقي لازم نحمد ربنا علي النعمة دي علشان تزيد..

وكمان أوعي تظن أبدا أن علو الهمة ده جاء من عندك..
لأن احنا متفقين أن الإنسان ضعيف ولا يقدر علي شيء إلا بإذن الله ...

إزاي بقي نسعي لتحصيل الهمة العالية ؟

من أهم الأسباب تذكر الهدف واستحضار النية الصالحة..
يعني لما تتذكر علي طول أنك بتعمل العمل ده علشان خاطر تحقق هدفك الرئيسي اللي هو رضا الله تعالي...
علشان تفوز بجنته سبحانه..
وتستحضر نية كويسة في عملك ده زي ما قلنا المرة اللي فاتت..
إن شاء الله ده يكون سببا في إشعال همتك...
لأنك بتبص لقدام...أنت مش بتبص تحت قدميك..لأ أنت مسلم عليّ الهمة...بتبص لهدفك..وهدفك أمامك مش أسفل قدميك..


ثانيا اقرأ كثيرا عن وصف الجنة والنار.....
احفظ في قلبك آيات الله تعالي وأحاديث رسول الله صلي الله عليه وسلم عن وصف الجنة والنار..
لأن هذا جدير أنه يوقد همتك..
وكل ما تلاقي حاجة في الدنيا تغريك أنك تحيد عن الطريق المستقيم أو تنسيك هدفك علي طول افتكر الجنة ونعيمها المقيم...وأنك لما تترك العمل المحرم ده في الدنيا ربنا هيعوضك أفضل منه بكثير إن شاء الله في الجنة..
وأيضا استحضر آيات العذاب حتي لا تغفل لحظة فتقع في ذنب ...

يا اللي عمال تبص للبنات حرام عليك !! بقي تضيع الحور العين في الجنة علشان خاطر نظرة في الدنيا تليها حسرة ؟؟
يا اللي لسانك مش مستقيم..كفاية غيبة ونميمة وسب وبذاءة..يا أخي ما تجعلش كلمة بسيطة تكون سبب حتي في أن درجتك في الجنة تنزل..

طب بالله عليك يا أخي..مش خسارة علشان خاطر كلمة تقولها...ولا نظرة تبصها...ولا فعل تفعله..مش خسارة حاجة تافهة زي دي تحرمك من رفقة الرسول صلي الله عليه وسلم في الفردوس الأعلي ؟؟
يا أخي أنت تتحرق شوقا لرؤيا الحبيب صلي الله عليه وسلم...أنت مشتاق له يا أخي !!...اصبر شوية علشان نشرب من إيده علي الحوض إن شاء الله..

ثالثا خللي بالك ..ربنا سبحانه وتعالي أعطاك إمكانيات وقدرات معينة...وأنت عليك تستغلها صح...قدمت إيه لدين الله حتي الآن ؟؟ طيب وناوي تقدم إيه ؟؟
هدفك يا أخي ماشي ناحيته ولا حدت عنه ؟؟؟!!


الفرق بينك وبين العباقرة والمجددين هو استغلال العقول والقدرات,,مش موضوع أنهم أذكي أو أحسن..
يقول وليم جيمس وهو أبو علم النفس الحديث (( إن الفرق بين العباقرة وغيرهم من الناس العاديين ليس مرجعه إلي صفة أو موهبة فطرية للعقل , بل إلي الموضوعات والغايات التي يوجهون إليها هممهم وإلي درجة التركيز التي يسعهم أن يبلغوها )).

ما تضيعشي لحظة !
هتقول مش مهم اللحظة دي..واللحظة دي...تلاقي في الآخر ضيعت ساعات وأيام بدون فائدة إن لم يكن في ضرر..
الوقت ضيق يا أخي واحنا ورانا شغل كتير...
قال رسول الله صلى الله عليه وسلم: ((من خاف أدلج، ومن أدلج بلغ المنزل، ألا إن سلعة الله غالية، ألا إن سلعة الله الجنة)) رواه الترمذي وقال حديث حسن.
و<أدلج> معناها: سار من أول الليل. والمراد: التشمير في الطاعة، والله أعلم.

اقرأ علي طول في سير الصحابة والتابعين والأئمة...شوف كانوا بيعملوا إيه علشان يحققوا أهدافهم وينالوا رضا الله تعالي...
مش هم كانوا بشر زيي وزيك ؟؟ مش كانوا محتاجين للأكل والشرب والنوم ؟؟ أمال ليه هم وصلوا واحنا لسه مش قادرن نتحرك !!!!
بص يا أخي...أنت والصحابة والتابعون وأتباعهم علي خط سباق واحد...هل أنت أهلا للسباق ده ؟؟؟

العبادات...أكثر من العبادات...انسي كلمة "أصلها سنة" و "دي مش فرض" و "هو لازم" والكلمات المحبطة دي..
طالما حاجة وردت عن الرسول صلي الله عليه وسلم يبقي ننفذها...
أصل احنا مش عايزين ننجح وخلاص..لأ احنا عايزين ننجح بتفوق..يعني بامتياز...يعني الفردوس الأعلي يا أخي !!

الصبر يا أخي..مهم جدا
مش مجرد أنك تفشل مرة توقف المحاولة...بالعكس..
لازم تصبر وتبدأ تاني..
إياك تخللي فشلك هو نقطة وقوفك...بالعكس ده أنت تحول كل فشل يمر بيك إلي خبرة عندك توصلك للنجاح التالي..
لله در من قال:
إني رأيـت في الأيام تجربة للصبر عاقبة محمــودة الأثر
وقل من جد في أمر يطالبه واستصحب الصبر إلا فاز بالظفر


اجتهد في تقليل أوقات الترفيه والنوم, فإن العمر قصير.

وكمان فيه ظاهرة غريبة شايفينها حوالينا
كل يوم نلاقي أعداء الإسلام يعملوا حاجة جديدة ويتحركوا خطوة في طريقهم..واحنا كسلانين...أكتر حاجة عندنا الكلام...
وده مش المطلوب !
مطلوب كلام مع أفعال...مطلوب كلام مع تنفيذ...مطلوب كلام مع حركة...
قال تعالي: (وَلاَ تَهِنُواْ فِي ابْتِغَاء الْقَوْمِ إِن تَكُونُواْ تَأْلَمُونَ فَإِنَّهُمْ يَأْلَمُونَ كَمَا تَأْلَمونَ وَتَرْجُونَ مِنَ اللّهِ مَا لاَ يَرْجُونَ وَكَانَ اللّهُ عَلِيمًا حَكِيمًا) ( النساء :104 )

إياك ترضي بالمستوي الأقل...ولا حتي بالوسط...علي الهمة أنت...مثابر مقدام...
ولا هترضي بالوسط..
معني أنك ترضي بالوسط أنك تترك الأعلي لغيرك...ومحدش يستحق المكانة العليا إلا أنت !

أوعي تتواكل وتقول "أنا هأستني لما ربنا يرزقني علو الهمة"...كده غلط..فالله عزيز...عليك البداية وعلي الله التمام..
قال تعالي: (وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمُحْسِنِينَ) (العنكبوت:69)

وكمان الدعاء..
دائما ادع الله تعالي أنه يرزقك علو الهمة...وأنه يعينك علي تحقيق أهدافك...
قف بين يدي الله في الليل واخشع واخضع..تضرع وابك..اشك نفسك لمن خلقها.......بث شكواك لله يا أخي..
من أين لك بالهمة العالية ؟؟ من الله ؟؟ أيوة من الله !! اطلبها من الله يا أخي !


اجتهد في التركيز حتى تعتاده.
يقول وليم مولتون المتخصص في علم النفس (( وهذه القدرة تكتسب بالمرانة , والمرانة تتطلب الصبر فإن الانتقال من الشرود إلي حصر الذهن حصرا بينا محكما هو ثمرة الجهد الملح , فإن استطعت أن ترد عقلك مرة بعد أخرى وخمسين مرة ومئة مرة إلي الموضوع الذي عزمت معالجته فإن الخواطر التي تنازعك لا تلبث أن تخلي مكانها للموضوع الذي آثرته بالاختيار ثم تلقي نفسك آخر الأمر قادرا علي حصر ذهنك بإرادتك فيما تختار ))


أخي..
اصدقني القول..
أمتنا بحالها ده تقدر تعمل حاجة ؟؟؟ تقدر تتقدم ؟؟؟
أمتنا مفتقدة البدر اللي يرشدها...
أمتنا ناقصها الناصح اللي يوجهها...
أمتنا منتظرة المصلح اللي ينصرها...

عارف ده مين يا أخي... ؟؟؟
أنت !

إيه المانع أنك تكون أنت اللي هترجع المجد لأمتنا ؟؟
قل لي مانع واحد ؟؟؟؟
أنت مسلم....بس خلاص خلصت !!
مفيش أي مانع...

أنت اللي مقيد نفسك بقيود من صنعك أنت...
ومحدش هيقدر يفكها غيرك...
ومش هتقدر تفكها إلا لو استعنت بالله..

قال صلى الله عليه وسلم: احرص علي ما ينفعك واستعن بالله ولا تعجز (رواه مسلم).

..
أخي
أنت واقف علي بداية طريق...
آخر الطريق ده فيه ضوء كبيييييير...وأنت عايز توصل له...
بتحاول توصل للضوء ده..
بتتحرك خطوة بخطوة...

الطريق ده هو المنهج اللي هتمشي عليه..
النور ده هو هدفك اللي عايز توصل له..
كل خطوة بتخطوها هي هدف قريب بتحققه علشان يوصلك لهدفك الرئيسي...
علشان تتحرك صح محتاج حاجة تدفعك..الحاجة دي هي همتك العالية...

أنت محتاج تبص دائما للهدف بتاعك...محتاج تستحضر دائما نيتك الخالصة...
وإلا هتشرد ويجذبك نور تاني ضعيف علي جنب الطريق...ولو وصلت له هتكتشف أنه نار مش نور...لأنك لم تخلص النية فيه...لأنه فتنة أغرتك في لحظة ضعف..
لو بصيت تحتك هتقع...لو بصيت وراك هتكسل...

أخي..
الطريق قدامك..
وهدفك منور لك طريقك...
وقد أعطيتك المحرك بفضل الله...

أخي...
انـــــــــــــــطلق !!

انا مبسوطة جدا بالمواضيع دى بس ياريت ياريت تكون فى حلقة مخصصة للحجاب وياريت متنسوش او تأجلوة
ضرورى ارجوكم وجزاكم اللة خيرا

الواجب عالطول بيتحل بس انتوا مش معانا عالطول

الحمد لله يامروة انك مبسوطة

ان شاء الله هيكون فيه قريب موضوع منفصل عن الحجاب لوحده

قريب جداااااا باذن الله

جزانا واياكم ياحبيبتى



معلشى يابيوتى

التقصير ده من عندى انا

معلشى سامحينى

ان شاء الله هحاول ماتاخرش عليكم كتييييير

بس والله انا بيبقى قصدى اننا ناخد وقتنا وننفذ الواجب كويس وندى له وقته

اوعدك مانتاخرش تانى باذن الله


جزاكم الله خيرا يابنات

اين بقية الأدباء ياترى

لسلام عليكم ورحمة الله وبركاته

شباب الصحوة !
بارك الله فيكم

بعد الحمد لله ما اتكلمنا عن التوبة..

وبفضل الله حددنا هدفنا ..وأخلصنا نيتنا...وأوقدنا همتنا...

عايزين بقي نبدأ نتكلم عن المنهج
بس زي ما قلت في الأول خالص فيه شوية نقط لازم نتفق عليها قبل المنهج الفعلي

حلو ؟

يبقي النهاردة إن شاء الله معانا



الأول عايزين نتكلم عن معوقات الإخلاص

معوقات الإخلاص خمسة...حفظنا الله وإياكم منها..
وهي:
1) الطمع:
وده علاجه أنك تزهد في اللي عند الناس...لأنك عايز اللي عند ربنا مش اللي عند الناس..
لو قلبك متعلق فعلا بما عند الله وبتحلم بجنته وبتفكر في ثوابه يبقي مش معقولة نظرك ينزل لمستوي حاجة في إيد غيرك..

2)حب المدح
يعني تحب أن الناس دائما تمدحك وتقعد تشكر فيك...

وده علاجه أنك تعرف أن مهما قال الناس عنك...فالممدوح حقا هو اللي ربنا راض عنه حتي لو ذمه الناس..
يعني أنت هتستفيد إيه لما أنا أقعد أقول لك ده أنت كذا وكذا بأمدحك...إيه اللي هيضاف إليك ؟؟..
وهأضرك بإيه لو قعدت أعيب فيك وأذمك ؟؟..
أهم حاجة أن يكون ربنا راضٍ عنك..قال بعض السلف: لن يكون العبد من المتقين حتى يستوي عنده المادح والذام

صعبة مش كده ؟
ربنا يقدرنا عليها

3)الرياء
يعني أنك تبقي بتعمل العمل ده مش علشان ربنا والعياذ بالله..لأ ده أنت بتعمله علشان الناس تشوفك فتقول أنك كويس..بترائي الناس بعملك..

وده علاجه إن شاءالله عن طريق:
استواء المدح والذم
وتذكر أن الله يراك دائما..وهو سبحانه أغني الشركاء عن الشرك

يعني هل يعقل أن أنت تعمل العمل وتتعب فيه وتتقنه...وبعد ده كل بدل ما تأخد عليه ثواب كبير يدفعك إلي الجنة برحمة الله ، لأ تقوم تفسد عملك ده كله علشان خاطر الناس ؟؟
دائما افتكر هدفك..رضا الله ..وجنة النعيم...أسمي هدف ...أهم من أي كلمة تقال في حقك..

4) العجب بالنفس
يعني أنك تبقي فرحان أوي بنفسك أنك عملت كذا وكذا...
ودي مشكلة لأنها ممكن تحبط عملك والعياذ بالله..

وحلها أنك تعرف وتتأكد أن كل اللي أنت فيه ده بفضل الله تعالي..
ربنا سبحانه وتعالي هو اللي يسر لك الخير اللي أنت فيه..فاحمده واشكره
وفيه غيرك من العصاة..لو ربنا شاء أن يجعلهم يهتدوا وأنك أنت تبقي عاصا بدلهم ساعتها مش هتقدر تقول لأ !

يعني كل ده من فضل الله...وأنت ليس لك يد في الموضوع...
فلا تركن إلي نفسك حتي لا تضيع..

4) احتقار الآخرين واستصغارهم

ودي حلها أننا نتأدب بما أدبنا الله تعالي به في كتابه العزيز
قال تعالي : ((فَلَا تُزَكُّوا أَنفُسَكُمْ هُوَ أَعْلَمُ بِمَنِ اتَّقَى ))[النجم : 32]
ويقول سبحانه: ((إِنَّ أَكْرَمَكُمْ عِندَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ ))[الحجرات : 13]

ممكن يكون اللي أنت شايفه عاص ده وفاكر أنك أعلي منه..ممكن يكون منزلته عند الله تعالي أحسن منك وأنت متعرفشي..ممكن يكون قلبه أنقي...ممكن تكون نيته أكثر إخلاصا..
طيب ده ممكن يكون هو بندمه علي معصيته أحسن منك بسبب تكبرك بأعمالك الصالحة !!..شفت بقي !

وبعدين أنت متعرفشي هيختم لك ولا له بإيه..نسأل الله الثبات علي الحق حتي الممات وحسن الخاتمة..آمين

دي يا شباب الخمس أسباب اللي يمنعوا الواحد أنه يخلص نيته في عمله لله تعالي...
المفروض بقي نحاول نتخلص منها كلها بالاستعانة بالله تعالي..

ولازم نعرف أن إخلاص النية ده من أهم الأمور...
وأنه مش هييجي إلا بصدق اللجوء إلي الله تعالي..
يقول سفيان الثوري رحمه الله: ما عالجت شيئا أشد علي من نيتي

وكمان بالدعاء...
عايزين ندعي الله سبحانه أنه يرزقنا الإخلاص في القول والعمل

قوم يا أخي في الثلث الأخير من الليل...
قوم ادع ربنا واسأله...تضرع إليه واخضع له..

اسأله أن يرزقك النية الخالصة..
اسأله أنه يثبتك علي الحق..
اسأله أن يهديك..

يا أخي إن لم تسأل الله فمن ستسأل بالله عليك ؟؟؟

أنا هأكتفي بالكلام ده المرة دي...
هي الحلقة دي قصيرة بس والله يا أخي في قمة الأهمية موضوع إخلاص النية هذا...

والواجب علينا المرة دي أننا نستحضر دائما نية صالحة في أعملنا
وكمان نسعي للوصول إلي الإخلاص في كل أعمالنا فنبتغي بها وجه الله تعالي ولا شيء غير ذلك..

ونسعي للتخلص من الخمسة معوقات اللي قلناهم..نحاول نطبق حلولهم..

نكمل الحلقة الجاية إن شاء الله...
والله المستعان