حور العين
5 Jun 2006, 08:57 PM
مالك يا مؤمن ؟؟... مكلضم كده ليه ؟؟
- مخنوق أوى يا صاحبي ... مش عارف مالي ؟؟
- ليه بس كده ؟...... أكيد في حاجة مضايقاك ؟؟؟..... احكي يا بني
- أصلي اليومين دول علاقتي بربنا وحشة أوى ... و مش عارف أعمل إيه ؟؟.... أنا حاسس إني متدمر
- ليه بس كده ؟؟.... إنت ما تعرفش الوصفة السحرية و لا إيه ؟؟؟
- وصفة سحرية ؟؟... إيه دي يا صاحبي ؟؟؟
- تدفع كام الأول ؟؟؟
- عشان خاطري قول بقى
- ص ق د ذ ص
- إيه إيه ؟؟.... يعني إيه الكلام الغريب إللي إنت بتقولله دا
- إمممممممم... هاقوللك يا مؤمن
ص ------< يعني الصلاة
إيه أحوالك مع الصلاة بقى ؟؟؟
- مش اد كده بصراحة ... انا مش منتظم معاها أوى
- طب بص بقى ... اسمع كلام ربي و ربك و هو بيوصيك بالصلاة :
" و استعينوا بالصبر و الصلاة "
يعني لو عاوز ربنا يعينك على الدنيا و على العبادة و على ترك المعاصي ... استعين بيه بالصلاة ... لإن الصلاة هي أكتر حاجة تقربك من ربنا ... و تخليك تعرف تكلمه و تقولله
- كلامك جميل أوى يا مؤمن .... طب يعني إيه (ق) ؟؟؟
- ق -------- < يعني القرآن
إيه نظامك بقى معاه ؟؟؟
- أنا محرج منك أوى يا مؤمن ... أنا القرآن دا بافتحه من رمضان لرمضان ... دا يعني لو فتحته في رمضان
- طب اسمع بقى كلام نبيك محمد (صلى الله عليه و سلم ) :
" إن الله يرفه بهذا الكتاب أقواما و يضع به آخرين "
و إنت لو عاوز ربنا يكلمك افتح المصحف و اقرأ فيه ... هتلاقي كل إللي إنت عايزه ... يكفي راحتك النفسية بعد ما تقرأ فيه
و إنت مش مطلوب منك تقرأ كل يوم المصحف كله ... يكفي بس تفتحه و تقرأ فيه ... ابدأ مثلا ب 10 آيات كل يوم ... و هيزيدوا إن شاء الله لو إنت عاوز بجد تقرب من ربنا ... و تأكد بإن إللي عاوز ربنا ربنا مش هيسيبه إن شاء الله ... بس إياك تنسى تقرأ منه ... خليك صادق مع نفسك و خمس دقايق كل يوم مش هتفرق يعني عشان تقرأ 10 آيات ... صح ؟؟؟
- أيوه ... عندك حق .........طيب إيه بقى ( د ) ؟؟؟
- د ----------- < يعني الدعاء
افتكر كده إمتى آخر مرة دعيت فيها ربنا
- يا ربىىىى ... أنا بقالي كتير أوى ما رفعتش إيدي و دعيت ربنا
- طب اسمع بقى ربنا بيرد عليك و بيقوللك إيه :
" و إذا سألك عبادي عني فإني قريب أجيب دعوة الداعي إذا دعانِ"
يعني ربنا قريب منك أوى ... و عمره ما هيسيبك و إنت محتاج له ... و طول ما إنت بتدعي ربنا و بتقولله على كل إللي إنت عايزه ... هو هيكون معاك دايما ... لازم كل يوم تدعي ربنا .. بالتأكيد إنت محتاج حاجات كتير ... أيا كانت الحاجة دي ... بس إنت محتاجها ... يعني محتاج لربنا في كل خطوة في حياتك ... و يعني مش هتفرق معاك كمان خمس دقايق تدعي فيهم ربنا ... دا إنت إللي محتاج له يا شيخ ... و يمكن لو إنت كنت دعيته عشان يهديك ... كانت تجي لك الهداية منه على طول
- لا لا لا ... أنا مش هاسيبك يوم بعد كده إلا لما ادعي فيه .... ربنا يكرمك يا صاحبي ... طب إيه بقى الحرف العجيب دا (ذ ) ؟؟
- ذ ------------- < يعني الذكر
هل بقى بتفتكر ربنا زي ما هو بيفتكرك دايما ؟؟؟
- يا ربىىىىىى .. أنا فعلا وحش اوى
- لا لا لا ... مش دا إللي إحنا عاوزين نوصلله ... إحنا عاوزين نعرف أخطاءناو نصلحها .... يعني اسمع كده كلام ربنا عن الذكر :
"و الذاكرين الله كثيرا و الذاكرات أعد الله لهم مغفرة و أجرا عظيما "
يااااااااه ... يعني من كلمة زي (لا إله إلا الله ) تكتب من الذاكرين الله كثيرا .... أو ( لا حول و لا قوة إلا بالله ) ..... (سبحان الله ) ... ( الحمد لله ) ... ( الله أكبر ) ... .................. كلمات قليلة بس ثوابها عظيم ... بس دي مش لازم حتى تخصص لها وقت في يومك ... بس شوف كده الوقت إللي بيضيع منك في حاجات مالهاش لازمة ... و استغله في الذكر ... يعني مثلا و إنت في ميكروباص أو في الشارع ... في الكلية بين المحاضرات و لا حاجة ... قاعد ماليش لازمة في البيت ... أذكر ربنا شويه ... مش هتفرق معاك يعني .... صح الكلام ؟؟
- إمممممممممممم ... كلام جميل .... طب إيه بقى حرف الـ ( ص ) دا تاني ؟؟؟........... الصلاة تاني
- لا لا ... دي حاجة مهمة أوىىىىىىىى ... من غيرها مش هتقدر على الحاجات دي كلها
- الله ... شوقتني ... إيه بقى دي ؟؟؟
- ص ------------- < الصحبة الصالحة
دي بقى حاجة خطيـــــــــرة أوى ... يعني لو عاوز تقرب من ربنا ... غير صحبتك السيئة
- طب أنا مش لاقي غيرهم يعني ... و كمان أنا لما ربنا يهديني كده هاخد بإيديهم برضو
- بص يا مؤمن ... اسمع كلام نبيك كده :
" المرء على دين خليله فلينظر أحدكم من يخالل"
ما تقوليش هاخد بإيديهم أو إني هاهديهم لما ربنا يهديني ... إنت دلوقتي في مرحلة عاوز حد ياخد بإيدك ... سيبهم .. و صدقني لو إنت صادق مع ربنا ... هتلاقي الصحبة بجد إللي تعينك على العباد ة و ترك المعصية .... صدقني .... الموضوع دا متجرب و ناجح مليون الميه
- خلاص يا صاحبي ... انا هاسيبهم إن شاء الله ... أنا مش هاقدر على صحوبيتهم أكتر من كده ... كفايه رضا ربنا علي
- برافو يا مؤمن .... و بكده أكون إديتك الوصفة السحرية إللي تنجيك من البعد عن ربنا ...... و تأكد بإن أول الأحزان بتبدأ بالبعد عن ربنا ... لإن إزاي هيكون غضبان عليك و يعيشك سعيد ؟؟؟ .... و كتير أوى بتسمع عن ناس عايشة حياة كويسة و مستقرة ... بس طهقانة من نفسها ... و ما تعرفش إيه السبب ... و اسمع قول ربنا سبحانه و تعالى :
"و من أعرض عن ذكري فإن له معيشة ضنكا و نحشره يوم القيامة أعمى "
- يااااااااااااه ... انا فعلا كتير أوى باكون مخنوق و طهقان و متضايق ... مع إن مفيش أي حاجة مرت علي كانت مضيقاني ...
- طب يلا بقى راجع معايا إللي إحنا قلناه ... إيه هي الوصفة السحرية ؟؟
- ص ق د ذ ص
ص : الصلاة , ق : القرآن , د : الدعاء , ذ : الذكر, ص : الصحبة الصالحة
- بالظبط ... لازم يكونوا عندك كل يوم ... أتحداك لو قعدت شهر بس تمرن نفسك عليهم ... هتلاقي نفسك مرتاحة و بالك رايق ... و إن شاء الله مفيش مشاكل حاسس بيها
S A S A
5 Jun 2006, 10:15 PM
بجد مشاء الله على موضعاتك يا حور
ربنا يجازيكى خيرا عليها ان شاء الله
JustBeauty
6 Jun 2006, 06:59 PM
ميرسى يا حور على الموضوعات الرائعة
و اتمنى تشاركينا بيها عالطول
S A S A
7 Jun 2006, 06:22 PM
ان شاء الله تكونى معانا هنا على طول
never ending hope
7 Jun 2006, 11:10 PM
جزاكى الله خيرا على موضوعاتك يا حور
JustBeauty
8 Jun 2006, 10:21 AM
اخيرا انتى معانا يا never
منورة و يارب تبقى دايما معانا عالطول