"تربيه الارانب"
على فكره انا قرات حوالى 4/3من الكتاب بس حصلى نوع من اللغبطه مابين انواع العلف و مكوناته لكل مرحه
وعايز اعرف هو انا لما هاجى اشترى العلف هشترى كل المكونات ديه و بعدين اقعد اركبها انا ولا فى اعلاف جاهزه لان من الواضح ان ان المكونات كثيره ولكل مرحله (نمو وحمل و رضاعه و حافظات )يعنى الامور دخلت فى بعضها
افيدونا افادكم الله

السلام عليكم ورحمة الله وبركاته
الحمد لله انك نزلت الكتاب وقريته
وان شاء الله هنظبط الموضوع مع بعض
وهجاوب علي اسئلتك
بس انا اسفه مش هقدر ارد دلوقتي
عشان عندي كليه بكره
بس ان شاء الله مش هتأخر عليك في الرد
وعلي فكره انا بنت مش ولد

ربنا يكرمك يا اخ مسلم

الاخ كاشف
ان شاء نبتدي واحده واحده في المشروع
وياريت تسجل كل الكلام اللي هنقوله
عشان وقت التنفيذ تنفذه بالترتيب

نبتدي بالمكان

طبعا الشقه دي كويسه اوي ان شاء الله
والطريقه المثلي لتربية الارانب الان هي البطاريات
انت هتشوف كل غرفه تاخد كام بطاريه علي حسب حجم الغرفه وحجم البطاريه بس هنأجل الكلام علي البطاريات دلوقتي
وخلينا في المكان

1- ياريت الشقه تكون متبلطه او في اسمنت في الارض يعني اي حاجه تمنع التراب والبكتريا وتكون سهلة التنظيف
وكمان الحوائط كذلك تكون من الاسمنت مثلا

2- لازم يكون في مكان مخصص لتخزين العلف واحتياجات الارانب
بعيد عن حجرات البطاريات
وطبعا يكون في مأمن من الحشرات والفئران والحاجات
اللي بتحب الاكل دي

3- لازم يكون فيه اماكن للتهويه يعني شفاطات مثلا
او نوافذ عليها سلك وزجاج للتحكم في كمية الهواء اللي داخل
وياريت ماتبقاش النوافذ قصاد بعض عشان ماتعملش تيار هواء
يضر الارانب فيما بعد او في الشتاء

4- لازم يكون في مصدر للضوء لمدة 14 ساعه يوميا عشان ده بيساعد علي نشاط الامهات الفسيولوجي
يعني مثلا المتر الواحد من الغرفه بيحتاج لمبه 4 وات
وبقية اليوم بيبقي ظلام " بالليل يعني "

5- درجة الحراره داخل الغرف المفروض تكون من 18- 21 درجة فقط
عشان الحراره الزياده بتأثر علي الخصوبه

6- واخيرا وده اهم حاجه لازم ترش الشقه كويس جدا
وتعقمها هي والبطاريات قبل دخول الارانب بيومين علي الاقل
وده هيبقي بديتول متخفف في مياه
وبترش بيه الشقه كلها حيطان وارضيه والبطاريات كمان
وتتركه ليجف وبعد يومين تلاته تدخل الارانب
وده للوقايه من الجرب اللي هو عدو الارانب

كده ان شاء الله يكون خلص الكلام عن الشقه
حاول تظبطها علي الاسس اللي قلتلك عليها
وان شاء الله لو في حاجه زياده هبقي اقولك عليها

بالنسبه للعلف طبعا الاسهل انك هتشتريه جاهز
وهنبقي نتكلم عنه بعدين
بس خلينا ماشيين واحده واحده

المره الجايه ان شاء الله
هبقي اكلمك عن البطاريات

السلام عليكم ورحمة الله
الله يكرمك يا اخ مسلم ............

السلام عليكم ورحمة الله

اختى الكريمه اشكرك جزيل الشكر على تعاونك معى
وان شاء الله هقوم بعمل هزه الخطواط وفى انتظار المزيد من المعلومات
وارجوا انى ماكنش بعطلك عن الكليه و على الغلط الغير مقصود كونك بنت او ولد

يا دكتوره......
ارجوا ان يكون المانع عن الرد خير انشاء الله فى معلومات تانى ولا ايه
عايز ابدا المشروع قبل ما الدراسه تشد
وكل عام وانتم بخير
ورمضان كريم
و سلام

انا اسفه جدا علي التأخير يا كاشف

نتكلم دلوقتي عن البطاريات

1- فالتقدم في صناعة البطاريات الان اصبح على قدم وثاق مع زهد سعرها , فمثلا البطارية المصنوعة من الصاج المجلفن أو الهيدروستاتيك الــ 12 عين , الهرمية الشكل , بمحتوياتها من بيوت الامهات وبيوت الولد والمعالف والمساقي وخراطيم المياة و النبل للشرب اعتقد بــ 750 جنيها فقط لا غير مع صغر حجمها , وقلة مشاكلها , وسهولة تنظيفها , بالاضافة الى عزل كل ام عن غيرها لمنع انتشار الامراض , وسهولة مراقبة كل ام على حدة , وتوحيد العمليات , كل هذه المواصفات تسهل التربية ,

2- فيما يتعلق فى عدد الارانب فى القفص الواحد فلا بد ان يوضع فى القفص ارنب واحد ساواء كان ذكرا ام انثى ولا يوضع اكثر من ذلك با ى حال من الاحوال فى الاعمار الكبيرة اما فى الاعمار الصغيرة فيمكن ذلك

3- طبعا زي ماقلنا قبل كده البطاريه هتتنضف وتترش وبعد كام يوم هندخل الارانب فيها

والملفات اللي هرفقها دلوقتي فيها اعلانات عن بطاريات
اختار احسنها واشتريه
وعلي فكره انت ممكن تبدا ببطاريه واحده لحد ماتتعلم التربيه كويس وبعدين تكبر المشروع

بطاريات

اعلانات حلوه

لا اسف و لا حاجه .....
المهم دلوقتى انك تقوليلى ايه السلاله اللى انا هجبها عشان ابدا
وانا فعلا هجيب بطاريه واحده فى البدايه وبعدين اكبرها
واشكرك على المعلومات القيمه اللى انتى بعتهالى و انتظر المزيد
وياريت المره ديه لو ينفع تقوليلى العلف اجيبه منين و السلاله ايه عشان انجز فى الموضوع الله يكرمك
لان انا ورايه مشروع التخرج لو بدات احضر فيه يبقى كل حاجه فى مشروع الارانب ده هتتاجل اللى بعد التخرج واحتمال بعد الجيش

اوك
ان شاء الله نخلص كلام عن المشروع كله دلوقتي
--------------------------------------------------------------------

** سلالات الارانب
تربى الارانب لثلاث أغراض رئيسية هى انتاج اللحم والفراء والشعر .
1 - أرانب انتاج اللحم :
أ – صغيرة الحجم :
ويتبع هذه الانواع الهيمالايا – الغزال – الهولندى – الفضى ، ويبلغ متوسط وزن الانثى 2.5 - 2.8 كجم ووزن الذكر 2 - 2.2كجم .
ب – متوسطة الحجم :
ويتبع هذه الانواع البفرن ويبلغ متوسط وزن الانثى 3 – 3.5 كجم والذكر 2.5- 3 كجم .
جـ – كبيرة الحجم :
مثل البوسكات – الشنشيلا – البيبون - النيوزيلندى ، ويبلغ متوسط وزن الذكر 4 – 4.5 كجم والانثى 4.5- 5 كجم .

2 – أرانب إنتاج الفراء :
يستعمل الفراء فى عمل الملابس ويدخل فى صناعة اللباد والجيلاتين ومواد اللصق والصباغة. ومن ضمن الانواع المتخصصة فى انتاج الفراء :
البفرن – الشنشيلا – الهافانا – الركس – النيوزيلندى الاحمر . وتتميز هذه الانواع بتنوع الوان فرائها وارتفاع ثمنه .

3 – أرانب إنتاج الشعر :
وهناك نوع واحد وهو الانجورا ومنه اللون الاحمر والابيض والازرق والرمادى ويبلغ انتاجه حوالى 500 جرام / السنة ويمكن استغلاله لمدة 5 سنوات لانتاج الشعر .

طبعا انت هتربي عشان اللحم
يبقي تختار اي نوع من اللي فوق
والافضل انك تسأل المحلات اللي بتبيع الارانب ايه هو اكتر نوع
النس بتطلبه وتربيه
ده هيكون افضل اختيار ان شاء الله
---------------------------------------------------------------------

كنت نسيت اكلمك عن غرفة الولاده اللي هتبقي في البطاريه
عشان دي مهمه اوي

الأرضية في غرف الولادة بأي حال من الاحوال لا يمكن أن تكون شبك . لآن هذا سيؤدي الى موت النتاج ...

لابد من تزويد قفص الولادة بحاضنة او غرفة للولادة و هو في الغالب يكون مصنوع من الحديد المجلفن و المبطن و في الغالب تكون غرفة مقسومة الى جزئين ... جزء يفتح في الشباك و الجزء التاني مدخله في الغرفة الاولة من الداخل ... و عند إقتراب موعد الولادة يتم إضافة قليل من القش في الغرفة و ستقوم الأرنب بوضع الفرو في هذا القش ... و هذه هي الغرفة المثالية للولادة .
بالنسبة لغرفة الولادة فى الارانب فهى ليست بغرفة كبيرة ولكنها عبارة عن صندوق صغير يلحق بقفص الام و هو يصنع من المعدن او الخشب ولكن يتم تغطية الارضية بفرشة مناسبة من التبن او القش او اى مادة متاحة فى البيئة توفر الدفء للخلفة مع شعر الام

وان شاء الله هتلاقي بطاريات مزوده بغرف ولاده مجهزه
-----------------------------------------------------------------------

تحديد الجنس

فيما يتعلق بتحديد الجنس فى الارانب فاود ان اذكر انه يسهل ذلك فى الاعمار الكبيرة ( البالغة و الناضجة جنسيا) و كذلك الاعمار من بعد 3 شهور حيث يلاحظ نزول الخصى فى الذكور ووصولها الى الحجم المناسب عند التزاوج و عند الضغط على الفتحة التناسلية يلاحظ خروج العضوالذكرى

وبالنسبة للانثى البالغة فلا يلاحظ وجود اى اعضاء جنسية خارجية مع وجود فتحة تناسلية دائرية.

اما بالنسبى لتحديد الجنس مبكرا فانه يمكن اجراءه فى اعمار مبكرة جدا حيث يمكن اجراءة من عمر 3 اسابيع من ع مر صغار الارانب حيث يتم قلب الارنب على كف اليد و لاحظ الفتحة التناسلية للارنب و يتم الضغط عليها برفق فيلاحظ وجود شكل دائرى للفتحة يدل على الذكر و شكل محروطى للفتحة التناسلية يدل على الانثى و لكنها تحتاج لمزيد من المران وهى سهلة و سريعة ا لاجراء اذا ما كنت هناك خبرة جيدة

وده هتحتاجه لما تعوز تحجز اناث عشان يبقوا امهات وماتبعهمش
----------------------------------------------------------------------

الاهتمام بالامهات

1) العزل التام والراحة بعد التلقيح
2) الاهتمام بالتغذية السليمة ( عليقة امهات ) حوالي 350 جم في اليوم , مراعاة عدم الزيادة لكي لا تسمن منك .
3) اعطاء الامهات القش أوالورق أو القماش قبل الولادة مباشرة لبناء العش .
4) لا تنسى الجس عند يوم 13 و 26 من التلقيح للاطمئنان .
5) بعد الولادة مباشرة اعطاء اوكسي تتراسيكلين طويل المفعول لتجب الاصابة بالالتهابات بعد الولادة أو التهاب الحلمات ( اذا حدث التهاب الضرع او الحلمات , ينزل الصديد في اللبن فتموت الولدة ) .
6) تقسيم الشهر الى 4 اسابيع :
الاول : اعطاء املاح معدنية في المياه بالجرعات المحسبوبة .
الثاني : اعطاء فيتامينات في المياه .
الثالث : مركبات السلفا بودرة و اقراص التيتراسيكلين في المياه كجرعة وقائة من الامراض .
الرابع : راحه مع الرعاية الجيدة ......... وهكذا
7) مراعاة وضع برمنجانات البوتاسيوم في الماء بكميه بسيطة ( حتى يصبح لون الماء برتقالي فاتح جدا ) لا تزيد الجرعة ( يرش في المياة كرشك للملح على الطعام ) للوقايه من السموم الفطرية .
---------------------------------------------------------------------

برنامج التحصين
طبعا ده اهم حاجه ولازم يتعمل في الميعاد لتجنب الاصابه بالامراض
عشان الارانب مش بتستحمل

1) تحصين التسمم الدموي البكتيري 1 مللي تحت الجلد , ثم اعطاء جرعة تنشيطيه بعد 15 يوم , ويكرر كل 6 شهور .
2) تحصين تسمم دموي فيروسي 0.5 مللي تحت الجلد , ثم جرعة تنشيطيه بعد 15 يوم , و يكرر كل 8 شهور .
---------------------------------------------------------------------

بانه من المفضل تلقيح الانثى بعد الولادة بمدة 5 ساعات ولفترة 5 ايام الاولى من الولادة حيث تكون الانثى فيها مهيأة للتلقيح و خصوبتها اتكون عالية فى هذ الوقت وتبدأ الخصوبة تقل بعد هذه الفترة المذكورة لذا يفضل التلقيح خلال هذه الفترة مع الاهتمام بتغذية الامهات جيدا لضمان استمرار عمليات التلقيح والولادة باستمرار و بكفاءة عالية
------------------------------------------------------------------------

العلف

فالعليقة لابد وان تحتوي على كل العناصر الغذائية من :
- كربوهيدرات و طاقة .
- بروتين
- الدهون
- الاملاح المعدنية
- الفيتامينات
- الالياف
- اضافات لزيادة قابلية طعم العلفة
- مضادات السموم ...... واخري
كل هذا لا اعتقد انك تستطيع ان تركبه او تديره بمفردك , لذلك انصحك ان تشتري العلف ( علف مرضعات ) جاهز , الشوال 50 كجم بحوالي 60 جنيها , يكفي ثلاثة امهات لمدة 50 يوما تقريبا .
لا تعتقد اني ابالغ في الاسعار او اني اقول كلام خيالي فهذا الشوال مثلا بـ 60 جنيها نعم , ولكنه يعطي جيل كامل من الخلفة فبعد شهر اوتحديدا 31 يوم هذه الــ 3 امهات انجبت 15 ارنبا فأصبح القطيع به 18 ارنبا . تحسب هكذا ولا تنظر الى المال كقيمة و لكن انظر الى الانتاج الذي سياتي

طبعا كل عمر وله العلف الخاص بتاعه
هتلاقيه عند العلاف وهتحدد كمية العلف زي مامكتوب في
الكتاب اللي بعتهولك في الاول
وطبعا ممكن تاكلهم برسيم بس بلاش يكون طري اوي
وبلاش يبقي كتير
-------------------------------------------------------------------

انا كده خلاص الحمد لله خلصت اللي عندي
عاوزاك دلوقتي بقي تفكر في الموضوع بشكل نرتب
وتكتب خطه وتحتفظ بيها
يعني مثلا كمية العلف اللي هتأكله ومواعيده
ومواعيد التحصينات ومواعيد الولاده والفطام " بعد حوالي شهر ونص "
كده يعني
رتب كل حاجه وتوكل علي الله
ولو في اي مشكله قولي علي طول

بالتوفيق

ايه ده كله ايه ده كله ..........
يا دوك انى اشكرك جزيل الشكر على الاهتمام ولكنى عندى بعض الاستفسارات عن () بعد الولادة مباشرة اعطاء اوكسي تتراسيكلين طويل المفعول لتجب الاصابة بالالتهابات بعد الولادة أو التهاب الحلمات ( اذا حدث التهاب الضرع او الحلمات , ينزل الصديد في اللبن فتموت الولدة ) .
6) تقسيم الشهر الى 4 اسابيع :
الاول : اعطاء املاح معدنية في المياه بالجرعات المحسبوبة .
الثاني : اعطاء فيتامينات في المياه .
الثالث : مركبات السلفا بودرة و اقراص التيتراسيكلين في المياه كجرعة وقائة من الامراض .
مراعاة وضع برمنجانات البوتاسيوم في الماء بكميه بسيطة ( حتى يصبح لون الماء برتقالي فاتح جدا ) لا تزيد الجرعة ( يرش في المياة كرشك للملح على الطعام ) للوقايه من السموم الفطرية )
من اين اجيب الادويه ديه والعلف ؟؟من كليه الزراعه ولا ايه ؟؟

وال( تحصين التسمم الدموي البكتيري 1 مللي تحت الجلد , ثم اعطاء جرعة تنشيطيه بعد 15 يوم , ويكرر كل 6 شهور .
2) تحصين تسمم دموي فيروسي 0.5 مللي تحت الجلد , ثم جرعة تنشيطيه بعد 15 يوم , و يكرر كل 8 شهور .)
من اين ؟؟؟يعنى الاقيها فى الصيداليه يعنى ولا ايه؟؟
وهل الحقن بتاعت الارانب زى بتاعت البنيادمين ولا ؟؟اجبها من اين ؟؟

بقولك ايه انت عندك فكره بقى عن تسمين العجول لانى فى واحد صاحبى عايز يعمله على شكل صغير بردو ة و لا انتى تخصص ارانب وبس

طبعا انا عارف انى بتقل عليكى بس ان شاء الله كله فى ميزانن حسناتك
و لو عايزه اى معلومات فى المجال الكمبيوتر انا فى الخدمه

نسيت اسال ايه ( لا تنسى الجس عند يوم 13 و 26 من التلقيح للاطمئنان .)
انا مش فاهم

انا دخلت هنا بالصدفه وقرأت كل الموضوع
فعلا دكتور او دكتورة سلسبيل عندها معلوملت جيده وكلها صحيحه
وانا حبيت اساعدك لانك مبتدأ
انا اعرف اماكن الارانب والعلف والبطاريات والادويه كمان
وباسعار تناسب واحد مبتدأ
ودى نمرتى لو احتاجت اى حاجه
****

يا دكتوره ........................................

الف شكر يا weka ....ساقوم بالاتصال بك قريبا يا ريت اعرف اسمك
...او ياريت تبعتلى المعلومات اللى عندك على الemail

مش عارف ليه لـوتـس777 بتعدل على اللى احنا بنكتبة وشالت الemailورقم التليفون بتاع weka
الemail
****@yahoo.com

ياريت لما اخش تانى ملاقيش لـوتـس777 شالته

بسم الله الرحمن الرحيم

السلام عليكم ورحمة الله وبركاته،،

اولا يا اخي كاشف جزاك الله خيرا على الموضوع المفيد حقا .. خاصه انه يفيد مشروعات صناع الحياه للغايه ..

ولكن يا اخي الفاضل ..

من شروط التسجيل :

6- يمنع وضع الماسنجر أو البريد الإلكتروني في المشاركة و بصورة خاصة للفتيات.. و للمشرف الحق في حذف البريد الإلكتروني المنشور دون الرجوع للعضو أو العضوة و ذلك لفائدة للجميع.

وللاسف قد حذفت رقم الهاتف الذي وضعه weka .. فهو ادعي للحدف وقد اعاد وضع الرقم مره اخرى .. رجاء .. انا اعرف انه للمصلحه والتعاون على الخير ولكن هناك الرسائل الخاصه ..

معذره مره اخري ولكني سأضطر لتحرير المشاركات ..

بسم الله الرحمن الرحيم