ازيك يا ادباء وحشنى بقالى شوية صغنتتين مش باعمل مواضيع حلوة


يا رب الموضوع دة يعجبكم


الموضوع عبارة عن نصايح للمذاكرة واللى عاوز يذاكر ومش عارف يقول اية مشكلتو ونتناقش فية


واكيد كلنا هنستفيد يا اخواتى واللى عندو مشكلة مش مخلية مركز برضو يقول


واكيد هيلاقى نصيحة تنفعوا

لا موضوع حلو انت تغيب فترة متعملش موضوعات ولما تعمل بتنشن على الموضوعات التمام بجد جامد الموضوع دة انا بقى لسة مبداتش مذاكرة بس انا عاوزة اطلع صافى السنة دى مش عارفة بقى ابدا امتى المذاكرة

اصلها فترة المراقبة بتاعتى فلازم التجديد


المه عاوزين كلو يشارك فى الموضوع دة


نصايح عامة


ادعية للمذاكرة


حلول لمشاكل المذاكرة بالنهار او بالليل



واللى عندو مشكلة يقولها برضو

ما شاء الله فكرة الموضوع جميلة
جزاكم الله كل خير
بس انا مشكلتى مع المذاكرة انى لسه فرقة اولى ومش فاهمة حاجة فى اى حاجة خالص
يعنى مش عارفة اذاكر منين بالظبط الملازم ولا الكتاب ولا المحاضرات
فبجد مش فاهمة اى حاجة خااااااااالص
وده بيزهقنى لما بمسك اى حاجة اذاكرها الاقى فى تعارض كبير مابين اللى سمعته فى المحاضرة وبين الكتاب او الملزمة
فبسيب المذاكرة خالص
مش عارفة بقى اعمل ايه
ياريت اى حد اكبر من ينصحى
وجزيتم الفردوس الاعلى

بصى يا اسيل احنة كلنا كنة كدة فى الاول والقلق اللى انتى فية دة كلنا مرينا بية فى سنة اولة وقدامك لقبل الامتحان بشهر


وتجيبى كمان تقدير كويس بس انا مش عاوزك تذاكرى فى الاخر ابداى من الاول



اما بالنسبة لمشكلتك فانا عاوز ااقولك انك لازم تفهمى اسلوب الدكتور الاول هل هوة بيحب المذاكرة من الكتاب


ولا الملزمة ولا المحاضرة ودة عشان تعرفى تذاكرى ازاى وكمان لازم تسالى الناس بتوع تانية عن اسلوب الدكتور


واية الطريقة اللى من خلالها تقدرى تجيبى درجة عالية فى مادتة هل الكتاب ام المحاضرة ام الملزمة


وبالنسبة للمذاكرة ابداى ااقرى فى الكتب بفهم دة المطلوب منك دلوقتى



بس كدة

جزاكم الله خيرا يا اخ بيبو على النصيحة
هاحاول انفذ اللى حضرتك قولت عليه

فكرة ممتازة فكرة المذاكرة اكيد هنشجع بعض


جزاك الله كل خير


عايزة اقول لاسيل حاجة من واقع خبرة تلات سنوات

بصي ياستى .. انا عارفة مدى القلق اللي انتى فيه بس طول مانتى متابعة اللي بيحصل في المحاضرات اكيد هتكونى عارفة حاجات كتير لانك بتخدى المعلومة من الدكتور نفسه واكيد بتخدى بالك من اسلوب الدكتور وبالتالي هتعرفي هو عايز ايه في الامتحان او ايه طريقة الاجابة اللي تبسط الدكتور في الامتحان حاولى تستشفى من المحاضرات اسلوب الدكتور بيكون عامل اذاي وبالتالي جاوبي بالطريقة اللي تريح الدكتور ..

بالنسبة للملازم الخارجية ممكن تفيدك بس في شرح المادة لكن خلى المرجع الأساسي للمذاكرة هو الكتاب اللي بيحدده الدكتور

عارفة ليه لان الملازم بتبقى تلخيص للمادة وفي معلومات كتير جدا بتبقى مهمة مش موجودة في الملزمة عشان كده الكتاب بيبقى في المحتوى الكامل قدامك كل المعلومات وبشطارتك انتى بقى تخططى على المهم اللي تركزى عليها ويبقى انتى كده عملتى لنفسك مخطط بايدك ويساعدك كتير في استيعاب المادة


اول مرة هتمسكى فيها الكتاب هتزهقى وترمى الكتاب في اي حتة وهتنامى او حتى هتحطيه تحت المخدة وتنامى بصي نامى شوية ريحى فيها اعصابك وبعد كده امسكى الكتاب تانى اقريه هتلاقي نفسك مش مستوعبة اقرى تانى ركزى في فقرة فقرة طلعى الفكرة الرئيسية من كل فقرة اكتبيها على جنب في الهامش بالقلم الرصاص او حتى ياستى بالجاف وبعد كده جمعى الافكار واطلعى بالهدف الرئيسى من الفصل اللي بتذاكريه

حاولى كده وجربي هتلاقي الموضوع بسيط

حاجة مهمة جدا لازم تخدى بالك منها في المذاكرة وللاسف كنت بقع فيها كتير انى بركز اوى من اول مرة مذاكرة بمعنى انى بحفظ على طول او بذاكر بشكل مكثف وده متعبة قوى هتلاقي نفسك مرهقة جدا ومش هتقدرى تكملى

بصي ابتدى اقرى مثلا الفصل او الجزء اللي هتذاكريه اقريه قراية عادية وحاولى تفهمى فهم عادى كانك بتقري اي كتاب وبعد كده طلعى النقاط او اكتبي النقاط الرئيسية في الموضوع اللي بتذاكريه وبعدين خلاص انتى خدتى فكرة عن المقرر اللي في الفصل ده تعالي مرة تانية وذاكرى الموضوع من تانى هتلاقي المذامرة المكثفة نوعا ما حلوة وانك فاهمة الموضوع تعالي بقى قبل الامتحان هتلاقي نفسك بتراجعى المادة وهتلاقي مذاكرتها قبل الامتحان سهلة جدا طبعا هتكونى فاهمة المادة كويس تحاولى بقى تحفظى النقاط المحتاجة حفظ او النقاط الرئيسية عشان تعينك على الحل في الامتحان


اهم حاجة بقى في ده كله استعينى بربنا هتلاقي ربنا بيكرمك قوى وربنا يوفقك


ياجماعة انا من زمان مرغيتش في ساحة آداب ومبسوطة انى اتكلمت المرة ده كتير وقعدت ارغي ياريت بس محدش يزهق منى

بجد مش عارفة اقولك لحضرتك ايه غير
جزيتى الفردوس الاعلى
بجد المعلومات فادتنى اوى بتاعتك وبتاعة الاخ بيبو ربنا يكرموا
وان شاء الله تجيبوا تقدير امتياز السنة دى
وفقنا الله واياكم الله مايحب ويرضى

اللهم امين


ودة واجبنا يا اسيل



وبالنسبة لمانجايا ارغى براحتك لان دة بيتك


وكمان انتى افدتينا وميرسى على ردودكم


بس عاوزين نستمر فى الموضوع

الله

موضوع حلو اوى

أحب الناس إلى الله أنفعهم للناس

بس إيه يعنى الحقوقيين ياخدو بعضهم و يمشو و للا ايه

ربنا يوفقكو بجد .. و جزيت خيرا يا استاذ بيبو على الموضوع الجميل دا

منورانا يا طالبة


مين قال كدة تعالى ذاكرى معانا انتى واخ عمرو تنورونا





يالا عشان عاوزين نستمر

ربنا يخليكى ياأسيل كلامك رفع معنوياتى كتير

الحمد لله انى قدرت أساعدك

ويارب بجد يكرمنا كلنا في السنة ده





شكرا جدا يابيبو وخلاص هتلاقونى برغى كتير

وان شاء الله نستمر في الموضوع ونقدر نشجع كلنا بعض




ربنا يخليكى ياأحلا سمسمية





فعلا المذاكرة باليل حلوة بيبقى الجو هدوء والواحد بيبقى قاعد مع نفسه ومركز لكن نعمل ايه مع الناس اللي في البيت ويبقوا صاحيين لحد الصبح فبضطر اذاكر احيانا الصبح


احلا وقت في المذاكرة وبلاقى نفسي مركزة قوى مثلا من الساعة الثالثة صبحا او بعد الفجر مثلا لحد الساعة 8 أو 9 الصبح لما بقى الجو بيبتدى عشرة و11 و12 مابعرفش اذاكر وبقعد اضيع وقت كتير حد يقولى بقى علاج الموضوع ده

عالفكرة يا جماعة تركيز الانسان بيقل بالليل


مع انى مش بحب اذاكر غير بالليل



بس هاقولكم بجد عى طريقة جامدة وبيبقة كل اللى فى البيت نايمين



انا كنت بابدء مذاكرتى من 7 الصبح ااقعد لحد مثلا العصر وبعد كدة ادخل اانام لحد بالليل واصحة اكمل


وكدة ابقة ذاكرت الصبح وراجعت بالليل والطريقة دى بجد جامدة جدا


للى عاوز يجرب

هى فعلا ما شاء الله طريقة حلوة يا اخ بيبو
بس للى ينفذها صح
يعنى تقريبا بالنسبة للولاد سهلة شوية لان مش وراهم شغل بيت ولا اى حاجة
لكن البنات شغل البيت ومساعدة ماما وكدة يعنى فبيبقى صعبشوية
انا بالنسبة ليا مبعرفش اذاكر بالليل خاااااالص
بحب اوى اذاكر بعد صلاة الفجر بحس ان عقلى لسه صافى والوقت ربنا مبارك فيه
بجد جربوها صلوا الفجر وقوموا استعينوا بالله بعد قراة اذاكار الصباح وذاكروا

وربنا يوفقنا جميعا

فعلا يا اسيل انا جربت مزاكره الفجر فى ثانويه عامه وكانت كويسه اوى

دعاء قبل المذاكرة :

اللهم انى اسالك حفظ المرسلين وفهم النبيين والملائكة المقربين اللهم اجعل السنتنا عامرة بذكرك وقلوبنا بخشيتك واسررنا بطاعتك انك نعم المولى ونعم النصير وانك علىما تشاء قدير وحسبى الله ونعم الوكيل .



دعاء اذا استصعب شئ:

اللهم لاسهل الا ماجعلته سهلا انك تجعل الحزن ان شئت سهلا .





دعاء بعد المذاكرة :

اللهم انى استودعك ما حفظت وما فهمت وما قراءت فرده الى عند حاجتى ايه انه لاتضيع ودائعك انك نعم المولى ونعم النصير .

بصوا احسن وقت للمذاكرة الساعة4 الفجر يعنى الواحد يصحى يشرب عصير فريش وبعدين يصلى صلاة الفجر ويقعد يذاكر وممكن بقى ينام الصبح عالساعة 11 ويصحى عالساعة 4 العصر وبعد كدة يتغدى ويراجع الى ذاكرة وبعدين يدخل ينام من10 بجد دى طريقة حلوة اووووووووووى انا جربتها والطريقة الى بيبو قالها مبتنفعش معايا لان الى عندى فالبيت بيصحوا من بدرى اوى فمبحبش اذاكحر وحد موجود وصاحى بس دايما احب اذاكر وماما فالبيت لكن لما بتخرج مش بعرف على فكرة يابيبو الموضوع دة جاااااامد اوى هيفيد كل الاعضاء بجد ربنا معاك ويوفقك عالموضوع التحفة دة

ان شاء الله هحاول اثبتة



لو كان يستحق بس نستاذن مراقبتنا سمسمة الاول ونشوف رايكم الاول

هو فعلا محتاج تثبيت ياريت سمسمة تثبتة

انا بقة مشكلتى فى المذاكرة انى مبعرفش اذاكر لو فى حد بيهمس حتى جنبى لازم هدؤ تام



طول منا باذاكر محدش بيتكلم فى البيت لحد امة اتخنقوا منى



اخر بقة ما زهقوا جابلوى سدادة ودان عشان اعيش مع نفسى بقة





باذن الله الموضوع يتثبت بس امة نشوف سمسمة الاول

انا زيك كدا يا اخ بيبو

بس بئى علشان فى البيت هما اللى بيطالبو بالمذاكرة

بيضطرو يستحملو .. هى بتتباع فين السدادة دى يا اخ بيبو

هتلاقيها فى الصيدلية بس هاتى النضيفة انا اللى معايا المانى



عبارة عن تلات طبقات اول ما بتدخليها فى ودانك الطبقات بتتقلب



بس هية مفيدة جدا

جزاك الله خيرا يا بيبو

حلتلى مشكلة كبيرة

حلوة اوى السدادة ديه شكلى هجيب واحدة

انا عندى بس بستعملها وانا نازلة التمرين فى البسين

سيبكم من السدادات


عاوزين نعرف كل واحد بيذاكر ازاى



واية مشاكلة فى المذاكرة



انتوا شكلكم نايمين النهاردة يا ادباء

طيب نقترح مسالة دلوقتى




المذاكرة بالليل طبقا للعلم مش مجدية بنفس طريقة المذاكرة بالنهار



لان العقل بالليل بيبقة عاوز ينام لكن بالنهار كدة الواحد بيكون لسة فايق


اية رايكم

انا بختلف معاك يابيبو المذاكرة باليل اجمل وافيد ليه ؟ لان المعلومات بتكون متخزنة فى الذاكرة ولما بتقوم من النوم اول حاجة بتفتكرها هى اخر حاجة وهى المذاكرة وبالنسبة لنظام مذاكرتى اغرب من سمسمة شوية


انا الاول لازم اذاكرعلى السرير ( باخد راحتى ) اما المكتب برصص عليه الكتب والمذاكرات وبعد اذاكر مادة واحدة فى اليوم عشان اركز فيها بس بأخد كمية كبيرة واعد اقرا بصوت عالى اكنى بشرح لحد وبخطط على الاحداث الهامة وبكتب كلمات غريبة مالهاش دعوة بالمذاكرة بس بتفكرتى بحاجات وبعد ما بخلص المذاكرة الجزء الخاص بيا براجع على اللى ذاكرتة مرة اخيرة وبس وعدد سا عات مذاكرتى 4 ساعات بس

انا بقى نظام مذاكرتى انى بذاكر بالليل لان الجو بيبقى هدوء عام فى البيت و اقعد على المكتب و امامى حاجة المادة اللى هذاكرها

ثم ابدأ بوضع عناوين جانبية علشان اقسم بيها الفقرات و ابدأ ارقم الاحداث بالترتيب علشان اعرف اذاكرهم من غير ما انسى اى نقطة فيهم

و ممكن اقعد اذاكر من بلليل مثلا من الساعة 12 لحد الساعة 8 صباحا او 9 صباحا و بعدين ابدأ مذاكرة تانى على الساعة 4 العصر كمراجعة على الجزء الذى

تم مذاكرته و ابتدى اشوف هذاكر ايه و اختار مادة ثم ابتدى اخطط فى الكتاب الجزء المراد مذاكرته و اعمل نفس اللى عملته

بس فعلا مذاكرة بالليل افيد بكتير لانى بحصل فيها اكتر ما بذاكر فى النهار لان بالنهار الجو دوشه و ازعاج و هلكه منزليه احيانا

بالنسبة اللى انا باذاكر بالليل فى الشتا ببداء من 9 كدة لحد الصبح


باجيب كتاب المادة وملزمة الدكتور لو فية وافتح الفهرس بتاع الكتاب


واقسم اجزاء الكتاب كل يوم اذاكر فصل وعن طريقة المذاكرة



باجيب كشكول واكتب سين بحب اعمل اسئلة او باخد اسئلة الملزمة


احطها فى الكتاب وباقعد ااقرا الصفحة كتير لحد امة تثبت فى دماغى

بعد كدة اكتبها واسمعها لنفسى


بحب اذاكر عالسفرة وكتير باذاكر عالارض بس وانا باسمع لنفسى

لازم اتمشة فى الشقة واللى يشوفنى وانا باذكار ممكن يقول علية مجنون


اصل بحط مية جنبى والشاى طبعا وكل شوية ابل وشى بمية عشان افوق



ولو حسيت بتعب اخش اريح جسمى شوية وبعد كدة اكمل


بس عندى مشكلة الكمبيوتر مش قدرت استغنى عنة الترم اللى فات بس ربنا ستر

كنت كل شوية احطة فوق الدولاب وانزلة هههههههه

طب انا عندى نظام مذاكرة جامد لكل الاقسام :


وهو ان كل فرقة من كل قسم يحددوا الجزء المراد مذاكرته فى اى مادة مثال : مذاكرة المادة كذا من صفحة كذا الى كذا .


وبعد ان يتم مذاكرتة اى حد مش عارف معلومة او مش قادر يفهمها او اى سؤال صعب نتناقش فيه كلنا ونوصل لحل او اجابة للسؤال .


اى رايكم ومنتظر .

فكرة حلوة اوى يااخ زوسر
ولو اتنفذت فعلا هانشجع بعض جامد ع المذاكرة

اهو ادى اول رأى منتظر رد الباقى .

والله اقتراح كويس جدا و مشجع للمذاكرة

و كمان كل واحد هيحس انه فى تنافس مع غيره لانه لازم يخلص الجزء الذى تم تحديده

وانا مع هذا الاقتراح يا اخ زوسر

اقتراح جميل يااخ زوسر

بس تعديل صغير

الجزء اللى يتذاكر يبقى بالاسبوع

يعنى مش باليوم لانها هاتبقى صعبة علينا وكل واحد ومواعيده

احنا نحدد جزء كبير في كذا مادة بالاسبوع والجمعه نيجي ندى التمام

عشان كل واحد ياخد راحته

فعلا فكرة هاتشجعنا كلنا

طيب ياللا يااخ زوسر حط انت الجزء بتاعنا

اوك بس عندى سؤال :


انا وسمسمة اوشكنا ننا نخلص الموضوع الاول من مادة حضارة اوربا الوسطى اللىبينتهى عند ص 44 عايزين نعرف شجرة الدر ماشية معانا ولا لا ومنتظر ردها وبعدين ممكن ناخد مراجعة للموضوع الاول وناخد نصف موضوع الديرانية والرهبانية خلال الاسبوع القادم اللى بيبتدى من بكرة الى الاربعاء القادم بالاضافة ان اللغات كل واحد هيذاكرها لوحدة لانى مختلف مع سمسمة وشجرة الدر . ومنتظر رد شجرة الدر

طيب انا مين معايا نشجع بعض
شكلى انا لوحدى لغة عربية هاشجع نفسى
يالا انا واسيل هانشجع بعض

انت مش تركى يااخ زوسر ؟؟


طيب ايه المفروض الجزء المحدد وانا هحاول ابعت لشجرة رسالة



دعبسي على اعضاء في قسمك وحاولى تعتيلهم رسايل خاصة يجوا الموضوع

والله بجد

ربنا يوفقنا يارب

انا عارف ياسمسمة انى فارسى انا بقول انى هذاكرها لوحدى .



والجزء اللى قولت نذاكرة هو من اول موضوع الديرية والرهبانية فى مادة حضارة اوربا طوال ال10 ايام القادمة ابتداء من يوم السبت وهسيبكم تظبطوا نفسكم بكرة .


وبرضو خلال العشرة ايام دول هنذاكر اللغات اول بأول ومعاهم برضو مصادرحديث ال15 صفحة اللى فى الكتاب بس

تمام كدة .

تمام يااخ زوسر

الله المستعان

وانا معاكم باذن الله



بما انكم فى رابعة هتقولولى اذاكر اية معاكم


وتحددولى جزء معاكم



انا معايا دلوقتى كتابين حروب صلبية ومادة دكتور محمد عبد النعيم


ابدا باية والتركى لسة منزلش د


هوة ومادة جغرافيا اقتصادية اللى دكتورها اية مقولكوش ربنا يكرمة من وسع يا رب


واجكولنا كدة عن المواد والدكاترة بتوع تالتة ربنا يكرمكم

السلام عليكــم ورحمـة الله وبركاتــة ،،


بجد يابيبو هايل جدا الموضوع دةةةةةةةةةةةةةةةةةةةة

انا عاجبنى جدا وفكرتو جديدة

يالا فلسفة يجمع ويتفقوا على حاجة خلينا نشجع تاريخ ربنايوفقكم بجد

[quote name='habo ba3dhom' date='24 Oct 2008, 01:44 AM' post='1770475']
السلام عليكــم ورحمـة الله وبركاتــة ،،


بجد يابيبو هايل جدا الموضوع دةةةةةةةةةةةةةةةةةةةة

انا عاجبنى جدا وفكرتو جديدة

يالا فلسفة يجمع ويتفقوا على حاجة خلينا نشجع تاريخ ربنايوفقكم بجد




ميرسى يا هابو بس عاوزينكم تظهروا عالطول باذن الله





فين زوسر وسسمسة وشجرة الدر


مش ناوين تذاكروا حاجة النهاردة والا اية

انا كان عندى النت فاصل بقاله كذا يوم

انا بأذن الله هذاكر اليوم جزء من مادة دكتورة ليلى عبد الجواد حضارة اوربا فى العصور الوسطى

وربنا يسهل و ألحق اخلصه بس احسن الدكتورة ده بترى زى القطار مفيش عندها محطات خالص

ليه ما احنا موجودين اهو بس انااصلى مديهم كمية كبيرة لمدة 10 ايام بس واضح ان مفيش اسئلة فى المذاكرة


اتمنى الاقى .

انا معرفشحاجة عن الكمية للى المفترض انها تتذاكر لانى مكنتش بدخل الساحة لان النت كان فاصل

فبعد اذنك ممكن تعيد الكلام من تانى؟