السلام عليكــم ورحمـة الله وبركاتــة ،،

طبعا كل سنة وكلكو طيبين ومن ربنا قريبين وبعد كدة في الجنة متهنين

فكرة الموضوع ان واحد هيخش يكتب قصة حياتة باسلوبة طويلة قصيرة من وجة نظرة من وجهة نظر غيرة في نقاط
في موضوع تعبير باي شكل مش مهم المهم انو هيكتب قصة حياتة والواحد دة احنا اللي هنختارة يعني مش متطوع
الا اذا ظهر احد المتطوعيين وطلب انة يكتب قصة حياتة " طب وبعدين ياعم وبعد ميكتب قصة حياتة " اقلك وبعدين
احنا بقي هيجي دورنا ان احنا نعلق علي قصة حياتة دي ونسألة ونستفسر منة ونحرجة وكدة يعني وطبعا هوة ملزم
انة يجاوب ويفسر ويتحرج وبعد كدة نبدأ نختار واحد تاني يحكليلنا قصة حياتة وهلم جر .

بسم الله الرحمن الرحيم

فاصل و نعود

عدنا


طبعاً الذاكرة مش مساعدة خالص إني أجيب الأحداث اللي حصلت قبل ما تم التلات سنين ... ما فيش غير شويا لقطات بس للأقارب أثناء زيارتهم لينا .
ما علينا .... قبل ما أدخل الحضانة ( عادي يعني زي كل العيال ) طبعاً كان نفسي أدخل المدرسة .. و أقول إمتى يجي اليوم ؟
و جاء اليوم المرتقب و سيبت إيد والدتي ... ودخلت الفصل .... ترابيزات مدورة كده و حولها الكراسي .... إستلمتني الأبلة بتاعتنا ( كان إسمها أبلة حمدية ... الله يمسيها بالخير ) و قعدتني على ترابيزة مع ولدين و بنت ... أنا في الأول مكنتش مطمن للعيلين دول ... كان يقعدوا يبصولي و يوشوشوا بعضيهم .... وفعلاً .. روحت ما لقيتش معايا المقلمة بتاعتي .... قالولي في البيت بقى ... ده إنتا لسه أول يوم و إتقلبت في المقلمة ... أمال لما يعدي إسبوع هترجعلنا بإيه بس ؟ .. أنا قالت لأبويا إنتا لازم تيجيلي علشان تاخدلي حقي ..... بس مارديش .... وعرفت بعد كده هو مارديش ليه !
طبعاً .... تاني يوم رحت للعيال دي و قلتلهم إنتوا سرقتوا المقلمة و أنا هروح و أنا .... طبعاً معرفتش اخد منهم لا حق و لا باطل .
و عرفت إنهم ولاد عم ... واحد إسمه ( حمودة ) و التاني إسمه ( علي ) و ولاد تجار فاكهة .... بس بقى فضلنا مع بعض لحد ما قلبنا أصحاب .... أصحاب السو .

المهم بعد ما كنت بروح البيت كنت بجري علشان أتفرج على الكرتون اللي كان بيجي على القناة التامنة و أكل و أنام و أصحى أذاكر و أنام تاني .... هو ده اليوم .
و كانت أجازتنا ... جمعة و سبت ... كنا بنروح الجيزة يوم السبت علشان نزور الحبايب ..... كان بيت أبويا و بيت أمي في نفس الشارع .... جدي و ستي من أبويا كانوا لسه عايشين .... ستي من أمي كانت لسه عايشة اما والدها فكان متوفي من قبل ما أتولد .
و كنت بقى أقعد أتنطط من فوق لتحت .... كان بيت أبويا في الدور الأخير .... أمي بقى كانوا بعدهم ببيتين في الأرضي .

و ده كان نظام حياتي لحد ما دخلت أولى إبتدائي .



فاصل و نعود

عدنا

و دخلت إبتدائي ..... و دي كانت نقطة التحول في حياتي .


فاصل و نعود

أنا جيت أهو

فعلاً كانت نقطة تحول .... بدأت الدراسة ... و لبست الزي الرسمي للإبتدائية ( وكنت فرحان بيه أوي ... كنت صغير بقى ) و أول يوم .... قعدت جنب واحد إسمه أحمد عبد الله ... و الحصة الأولى عربي ... أبلة منى .... أنا كنت بقول أبلة مش ميس ... لأن كلمة أبلة دي كانت بتستفز أبلة منى جداً ( و كانت أبلة روشة جداً ) ... و أنا كنت ظاهرياً هادي جداً ... لكن ماكنش في مصيبة إلا و أنا ليا دور فيها .... لكن محدش يعرف .
و مرة جه موجه و قعد يسأل التلاميذ ... لكن محدش كان بيجاوب .... في اليوم ده المفترية فضلت موقفانا رافعين إيدينا لحد نهاية اليوم .... طبعاً في عيال راحوا إشتكوا لبهبهاتهم .... لكن أنا أبويا كان معودني إن المدرس على حق ... والمدرس ده بمثابة ... عارفين إنتوا ... المهم ... و مع أول إختبار شهر .... كنت أنا بقى مذاكر برفكت ( كانت الدروس إنتوا طبعاً عارفينها ... أنا أحب أبي و أمي و كلنا نعمل ) و حليت و الواد أحمد عبد الله ماكنش مذاكر كويس .. فساعدته .... و جات ساعة النتيجة ... كانت هي بتنده و تقول الدرجات .... لكن ماندهتش إسمي أنا و أحمد .... و بعد ماخلصت ... ندهت علينا و قالت تعالوا لي بره على السبورة .... و قالت إنتوا غشاشين إنتوا مش عارف إيه و انا هاعلق على دهركم يافطة مكتوب عليها غشاش .... المهم وبختنا .... ودي كانت أول تجريسة ليا ... و من ساعتها و أنا لا بغش و لا بغشش .

و فاتت الأيام .... لحد ما وصلت سنة خامسة .... في الفترة دي كان حصل موقف ... كنت حاطت 50 قرش ( مصروف ) في الشنطة و نزلت الفسحة ( طفل و لازم يعيش ) تطلعت مالقيتش الفلوس .... خبط في العيال كلها و إزاي أتقلب ( مكنتش ناسي حكاية المقلمة ) لحد ما واد قالي أنا شفت إسلام طلع الفصل ( إسلام ده كان سفروت صغير بس يوديك البحر و يرجعك عطشان .. من الآخر صايع ) و قلت له هات النص ياض ... قال لي نص إيه أنا ماعيش غير النص بتاعي .... عرفت بقى إن هو اللي أخد النص .... و مسكنا في بعض ...لحد ما دخلت أبلة هيام ... و قعدت برده تقول إنتوا فتوات و إنتوا ... إتجرست برده .... رحت أنا قايلها على الحكاية .... في الآخر قالت لي ... لو ليك حق هاتخده يوم القيامة .. رحت أنا قايلها و القيامة هتقوم إمتى أنا عايز فلوسي .. قالت خلاص إنتهينا .... و فعلاً خلصت الحكاية .... و في مرة قابلت الواد ده عند بيت الأجداد و كان معاه عجلة مأجرها .... رحت أنا واخدها منه و قعدت العب بيها و في الأخر رجعتها للست بتاعة العجل ... و كان سايب شبشبه عندها رحت واخده و رجعته للواد في المدرسة .... في فترة الإبتدائية دي كلها ... ما طلعتش للمدير غير مرتين و كنت مظلوم و الله ... كل واحد من العيال كان يروح يشتكي لأبوه ... كانت أيام سودا .

و خلصت مرحلة الإبتدائية .... و دخلت إعدادي .... مدرسة أبوالهول الإعدادية بنين ..... و كان شعارها .. البقاء للأقوى .... و خصوصاً بعد ماضموا لينا مدرسة الأهلية .... كان كل يوم أنزل الفسحة أشوف مذابح .... مدرسة الأهلية كانت سمعتها سبقاها .
و عدت السنتين الأولنين زي باقي الأيام .... مكنش في جديد ..... لحد سنة تالتة ... سنة مثيرة مليانة بالمغامرات .
و كنت أنا طالب نجيب هادي مالوش في المشاكل خالص و إين ناس و ده كان هدفي اللي عايز أوصله للمدرس اللي قصادي ... و أول ما أحس إنه بدأ يغير فكرته عني ... كنت بتنطط لحد ما يرجع عن اللي في دماغه .... ماهو مش باقي لينا غير السمعة الطيبة .

فاصل و نعود

عدنا من جديد

زي ما قلت لكم ... كنت بحاول أوصل للقدامي فكرة حلوة عني ... طبعاً هتقولوا حرباية و بتتلون ... لأ مش كده خالص .... لإني مؤمن بمبدأ إنك لازم تحترم اللي قدامك علشان هو كمان يحترمك ... و مكنتش بستحمل حد يقولي حاجة كده ولا كده ... لإن نفسي عزيزة عليا أوي .
و السمعة الطيبة هتنفعك في يوم من الأيام .... و أديكم هاتشوفوا .

سنة تالتة ..... أكتر سنة دراسية مفعمة بأحداث الشغب ... و في السنة دي زي ما قلت لكم ضموا لينا مدرسة الأهلية ( و ضموها علشان كانت بتقع ... طبعاً ما هو دول مش طلبة عاديين ) .... المدرسة دي أنا كنت بتجنب إني أمشي جنبها .... يقوم هما ضمينها .... قاعدنا نشتكي و نكلم المدرسين و نسخنهم .... لحد ما طلعوا قرار إن طلبة الأهلية يكونوا فترة تانية ... قلنا مش مهم ... كنا بنروح ... نرجع تاني يوم نلاقي الخراب في كل حتة ... تقولش الهكسوس .... إستحملنا بقى و رضينا بالأمر الواقع .
صحيح أنا نسيت أقولكم إني كنت فصل 3 / 10 ... وده بلا فخر كان فصل المتفوقين ( أ ) ..... فطلبوا من المدرسة إنها تشترك في برنامج إسمه سباق الطلائع ....قلت قشطة .. هنطلع على التلفزيون .. و فعلاً رحت .. و كانت المسابقة معمولة في نادي الصيد ... و دي كانت أول و آخر مرة أدخل في نادي الصيد ... حمامات إيه و نضافة إيه ... كانوا بيدخلونا واحد واحد الحمام ... واللي يرجع كان يحكي لنا على اللي شافه في الحمام ... و أنا لما دخلت الحمام ... و كانت أول مرة أدخل حمام نضيف كده ... لاقيت نوع من الحنفيات غريب ( دلوقتي بقت خلاص في كل حتة ... الحنفيات اللي هي بترفعها لفوق تقوم تنزل المية دي ... و يمين ساقع و شمال سخن ) و أنا حمار واقف قصادها و عمال أحول فيها لمين شمال مالها ... لاقيت واحد دخل الحمام ... شافني لايص ... راح رافع الحنفية لفوق راحت شغالة .... حاجة تكسف ..... المهم ..... بدأت المسابقة و وزعوا الأرقام علينا .... و ندهوا على رقمي و على رقم واحد صاحبي إسمه أحمد ..و إتنين من المدرسة المنافسة .. و المسابقة كانت إن في شابتين من اللي هما بيطلعوا كتير على الشاشة .. دورهم إنهم يتكلموا مع بعض عن بعض المعلومات العامة .. زي : تعرفي إن أنا قرأت النهاردة إن أول من إكتشف مش عارف إيه هو فلان الفلاني .... و إحنا المطلوب مننا إن إحنا نركز معاهم علشان بعد كده هيسألونا ... و وقفت جنب المذيعة ... و ورقها كان مكشوف قصادي ... و هي كانت تسأل و إحنا نجاوب و العيال التانية يعيني مش فاكرين حاجة من الي إتقال ...و إحنا شغالين على ودنه .... و ماخسرناش في المسابقة دي غير في المسابقة الرياضية ... و النتيجة النهائية 4/1 .

فاصل و نعود

عدنا

بعد ما خلصنا المسابقة دي ... سألناهم عن ميعاد البث ... قالوا لنا أول يوم العيد ... و كان فاضل حوالي 5 أيام على العيد .... وجت اللحظة المرتقبة .... وجمعت العيلة كلها و قلت للشارع كله ..... بقيت مشهور خلاص و طلعت في التلفزيون .... و بدأ البرنامج .... إيه ده ؟ ؟ ؟ و إذا بمدرستين غيرنا خالص .... مين دول يا إخوانا .... فين إحنا ؟ و خد عندك بقى تريقة من الصغير و الكبير ... و إنتا مجمعنا و إنتا ..... و معرفتش بعد كده إمتى البرنامج إتذاع و لا مذعهوش . . . نفضت بقى .

و زي ما قلتكم سنة تالتة دي كانت مفعمة بالحيوية .... و جت فترة إنتفاضة فلسطين .... و عملنا أبطال و طلعنا في المظاهرات لإن كان في عيال من مدرسة السعيدية كانوا بيجوا يخدونا و نطلع على الجامعة .. و كان في الفسحة مقضينها بالروح بالدم نفديك يا فلسطين .. وفي مرة و إحنا ماشيين ... أخدت عصاية من واحد جت في الساعة بتاعتي .... نزلت متفشفشة 100 حتة .... و صحبك باع القضية من أول ساعة .... و روحت البيت و أبويا قعد يوبخني برده ... وبلاش المظاهرات و كده ..... ونامت الحكاية .
و في الترم التاني و مع بداية جديدة كان المفروض ناقص لينا كتب ما إستلمنهاش ... كانت بتيجيلنا على الفصول بين الحصص ..... و مرة كانوا جابوا الكتب .... كان الدراسات و الإنجليزي و العلوم .... و سابوهم علشان المدرس كان بيشرح .... وبعد ما خلصت الحصة .... طلعت علشان أخد كتبي ...راح كام واحد قايم ورايا ... و واحد ورا التاني قلبت سوق التلات و المهم إن مفيش حد عارف ياخد حاجة .... العيال كانت بتزق بعضها و يقفوا على الكتب و الكتب إتقطعت ... واللي يهزر و يقول ... بـ 2.5 و تعالى بص .... ماهو سوق بقى ... انا بقى قعدت أعافر لحد ما أخدت نصيببي من الحرب دي .... و شيلت في الشنطة ... المهم راح طلع المدير على الصوت .... و المدرسة إتقلبت .... و نزلونا على حوش المدرسة ... و إتفقنا كلنا إن مفيش حد يقول حاجة على التاني علشان ما يوقعوناش في بعض .... و في نص الحوش وقفونا رافعين إيدنا كده ... زي الأسرى بالظبط ... و الله مشهد كان محتاج تصوير ... و العيال من الفصول كانت بتبص علينا ... و ماكنوش يعرفوا إيه اللي فيها .... و كانت الإدارة عاملة إجتماع بيحققوا فيه إزاي ده حصل و العيال دي هنعمل فيها إيه .. بجد المدرسة إتقلبت .. تحس إن إحنا قتلنا واحد ..... يا ترى هيعملوا فينا إيه ؟


فاصل و نعود

عدنا

و بعد مرور ساعتين تحت الشمس ... بدأوا يريحوا واحد واحد ... على حسب شخصيته .... ولاقيت أستاذ أحمد بيقولي تعالى ... أقعد هنا .... إنتا مالك إنتا بالعيال دي ... آه لو كلهم زيك كده في هدوئك و لا رزانتك .... ربنا يخليك لوالدك .... و أنا قاعد بسمع

و في آخر اليوم قرروا إنهم يفركشونا لمدة أسبوعين في فصول المدرسة ..... كانوا عايزين يهدونا شويا ... بصراحة كنا واخدين راحتنا حبيتين ..... و أخدنا الأسبوعين ..... وكانوا أحلى أسبوعين في المدرسة ... لا كان لنا غياب قاعدين منتشرين في المدرسة .... بس مش أوي .. لإن كان واقف تحت في الحوش أستاذ عصام ( الناظر ) و كان لابس نظارة و متهيألي ماكنش بيشوف بيها كويس ... يعني لو قفشك ... إنتا وحظك ... الضربة تيجي في عينك تفقعها .. على دراعك تكسره ... إنتا ونصيبك .
وقضينا السنة دي للآخر ... وكانوا مسمينا تالتة زفت ... لقب يعني ....... بس بصراحة كانت من أحلى سنين عمري ... كانوا مدلعينا أوي في المدرسة ... آه والله .... وبيحبونا ... يعني اللي كانوا بيعملوه ده من غيظهم ..... كفاية إن المدير كان بيطلع مخصوص كل يوم يطمن علينا ..... شفتوا .... حد بقى يلاقي دلع ولا يتدلعش .

فاصل و نعود